Թրամփն ու Մերձավոր Արևելքի իր բանագնացն Իրան հետ պատերազմելուն այնքան էլ հակված չեն. Շահնազարյան
01 Ապրիլի 2025, 22:30
Օրերս ԱՄՆ նախագահ Դոնալդ Թրամփը հայտարարել էր, որ «վատ բաներ կարող են պատահել Իրանի հետ», եթե իշխանությունները համաձայնության չգան Վաշինգտոնի հետ Թեհրանի միջուկային ծրագրի վերաբերյալ:
Alpha News-ը թեմայի վերաբերյալ զրուցել է «Ալիք» օրաթերթի գլխավոր խմբագիր Արամ Շահնազարյանի հետ:
«Թրամփի այս հայտարարությունը պետք է դիտարկել վերջին մի քանի օրերի իր կոշտ լեքսիկոնի ֆոնին: Նա այդ լեքսիկոնն օգտագործում է պարտադրելու իր ցանկությունը, իր կամքը մյուս կողմերին: Նա նման կերպ խոսել է նաև Ռուսաստանի, Ուկրաինայի, Եվրամիության, Կանադայի մասին: Եթե մենք հաշվի առնենք իր պաշտոնավարման նախորդ շրջանը և զուգահեռներ անցկացնենք այս շրջանի հետ, ապա կնկատենք, որ նման լեքսիկոնի օգտագործումը այդքան էլ զարմանալի չէ: Այստեղ կա մի շատ կարևոր նրբություն. չպետք է կենտրոնանալ այս խոսելաձևի վրա, քանի որ Թրամփը փորձում է, վախի մթնոլորտ ստեղծելով, հասնել իր նպատակին»,- նշել է Շահնազարյանը:
Նրա խոսքով՝ ԱՄՆ-ն Իրանին ստիպում է նստել բանակցությունների սեղանի շուրջ այն պայմաններով, որոնք նշված են եղել Թրամփի կողմից Իրանի գերագույն հոգևոր առաջնորդին ուղղված նամակում:
«Թրամփն իր պաշտոնավարման երկրորդ շրջանի սկզբում ստորագրեց Իրանի դեմ հավելյալ ճնշում գործադրելու փաստաթուղթը, բայց նշեց, որ չկամությամբ է այն ստորագրում: Ակնհայտ է, որ թե՛ Թրամփը, թե՛ Մերձավոր Արևելքի հարցերով իր անմիջական բանագնացը և խորհրդականը Իրանի հետ պատերազմելուն այնքան էլ հակված չեն, նրանք գիտակցում են՝ պատերազմն ինչ հետևանքներ կարող է ունենալ: Եվ այս լեքսիկոնը օգտագործվում է միայն ու միայն Իրանին ստիպելու նստելու բանակցությունների սեղանի շուրջ՝ հատկապես այն պայմաններով, որոնք նշված են եղել Թրամփի կողմից Իրանի գերագույն հոգևոր առաջնորդին հղված նամակում: Այլապես չեմ կարծում, թե Թրամփը և ընդհանրապես ԱՄՆ-ի վարչակազմը այնքան պարզամիտ ու միամիտ լինեն, որ կարծեն՝ Իրանը Սիրիան է, Լիբանանն է, Իրաքն է, որին կարելի է ռազմական գործողություններով ինչ-որ բան ստիպել»,- եզրափակել է Շահնազարյանը:
Հիմա եթերում
