Վաղարշակ Արզումանյան․ Հայաստանի կրկեսային մշակույթի հիմնադիրը
12 Մարտի 2024, 23:45
![](https://media.alphanews.am/wp-content/uploads/2024/03/12214054/photo1710271920.jpeg)
Alpha News-ը շարունակում է ներկայացնել «Ալֆա պերսոնա» շարքը:
Մարտի 12-ին լրանում է կրկեսային արտիստ, Հայաստանի ազգային Կրկեսային կոլեկտիվի հիմնադիր Վաղարշակ Արզումանյանի ծննդյան 124-ամյակը:
Կրկեսային արվեստը, անկասկած, ամենահուզիչն ու ամենահետաքրքիրն է։ Կրկես այցելում են բոլորը՝ փոքրից մինչև մեծ, քանի որ միշտ էլ հետաքրքիր է լինել ծաղրածուների, մարզիչների և կրկեսային արտիստների աշխարհում:
Հենց Վաղարշակ Արզումանյանն է ժամանակին դարձել Հայաստանի կրկեսի պատմության հիմնադիրը։
1956 թվականին Մոսկվայում պետք է անցներ հայկական տասնօրյակը։ Անմիջապես որոշում է կայացվել ներկայացնել նաև հայկական կրկեսային արվեստը։
Ընդամենը 6 ամսում Արզումանյանին վստահեցին հավաքել ազգային հավաքական։ Այդ ժամանակ կրկեսի հայ արտիստները տարբեր թատերախմբերի կազմում հյուրախաղերով հանդես էին գալիս ամբողջ աշխարհում, սակայն առանձին հայկական կոլեկտիվ չկար։ Արզումանյանը մասնագիտական աչքով անմիջապես բացահայտեց տաղանդավոր և պրոֆեսիոնալ արտիստներին՝ ընդլայնելով նրանց ցանկը։
Պաշտոնապես առաջին ազգային կրկեսային կոլեկտիվը բաղկացած էր 22 հոգուց։ Մոսկվայի փառատոնում նորաթուխ կոլեկտիվը մեծ հաջողություն ունեցավ՝ տպավորելով հանդիսատեսին։
1962 թվականի նոյեմբերի 29-ին Երևանում տեղի ունեցավ կրկեսի հանդիսավոր բացումը։ Եվ այդ ժամանակ այստեղ հավաքվել էին հանրապետության տարբեր վայրերից ժամանած հանդիսատեսներ՝ ողջունելու կրկեսային արտիստների հայկական կոլեկտիվին։
Վաղարշակ Արզումանյանը մեծ ներդրում է ունեցել Հայաստանի կրկեսի ձևավորման գործում: Նա հեղինակել է կրկեսային բազմաթիվ համարներ։ Բարձր վարպետություն և համարձակություն պահանջող նրա լավագույն համարը եղել է կրկեսի գմբեթից ձգված թեք պարանով, հատուկ անվակների օգնությամբ մեծ արագությամբ գլխիվայր իջնելը։
Արտիստն ունեցել է բազմաթիվ պարգևներ, նրան շնորհվել է ժողովրդական արտիստի կոչում, արժանացել է «Պատվո նշան» շքանշանի:
Վաղարշակ Արզումանյանը կյանքից հեռացել է 1968 թվականի մայիսի 9-ին: