Վլադիմիր Պուտինը՝ աշխատանքային միգրանտների և աշխատուժի պակասի դեմ պայքարելու մասին

Ռուսաստանում միգրանտների թիվը կազմում է աշխատողների ընդհանուր թվի 3,7 տոկոսը: Այս մասին ասել է ՌԴ նախագահ Վլադիմիր Պուտինը Դմիտրի Կիսելյովին տված հարցազրույցում:

«Աշխատանքային միգրանտները մեզ մոտ այնքան էլ շատ չեն, համեմատած այլ երկրների հետ։ Նրանք աշխատողների ընդհանուր թվի 3,7 տոկոսն են կազմում։ Բայց նրանք կենտրոնանում են այն տարածաշրջաններում, որտեղ տնտեսական կյանքն առավել ակտիվ է։ Եվ այնտեղ, իհարկե, նրանք ավելի շատ են։ Դրանք են՝ Մոսկվայի մարզը, Մոսկվան, հյուսիսարևմտյան շրջանը և հյուսիսի որոշ շրջաններ, որտեղ աշխատավարձի մակարդակը բարձր է»,-ասել է Պուտինը։

Սակայն, նրա խոսքով, կասկած չկա, որ դա այն հարցն է, որը հատուկ ուշադրություն է պահանջում իշխանությունների կողմից թե՛ տեղական, թե՛ տարածաշրջանային, թե՛ դաշնային։

Պուտինն ուշադրություն է դարձրել այն փաստին, որ երբ աշխատանքային միգրանտների են ներգրավում, միշտ խոսում են այդ մասին աշխատող ձեռքերի պակասի տեսանկյունից։

«Մեր գործարարները պետք է հասկանան, որ իրենց իրավիճակը, աշխատող ձեռքեր ունենալու տեսանկյունից, առաջիկա տարիներին դեպի լավը չի փոխվելու։ Նրանք աշխատուժի պակասի հետ են բախվելու։ Իսկ դա նշանակում է, որ այդ խնդիրն արմատապես լուծելու համար անհրաժեշտ է բարձրացնել աշխատանքի արտադրողականությունը և նվազեցնել աշխատողների թիվն այն հատվածներում, որտեղ դա կարելի է անել՝ ժամանակակից տեխնիկա ներդնելով»,-նշել է Պուտինը։

Դրա համար պետք է ներդրումներ անել և կադրեր պատրաստել։

Ինչ վերաբերում է հենց միգրանտներին, ապա, ՌԴ նախագահի խոսքով՝ գործընկեր երկրների հետ, որտեղից նրանք գալիս են, պետք է մտածել այն մասին, թե ինչպես նրանց նախապատրաստել Ռուսաստան ժամանելուն։ Խոսքը ռուսաց լեզվի, մշակույթի, ավանդույթների ուսումնասիրության մասին է։