Խաղաղության պայմանագրի ստորագրման պահանջներից մեկը «միջանցքի» խնդիրն է. Հակոբ Բադալյան

Քաղաքական մեկնաբան Հակոբ Բադալյանը կարծում է, որ Փաշինյանն ու Ալիևը վաղը Աբու Դաբիում սպասվող բանակցություններում քննարկելու են այսպես կոչված խաղաղության պայմանագրի ստորագրման պայմանները և այն, թե ինչ գին կունենա այդ պայմանագիրը Հայաստանի համար:

«Հասկանալի է, որ պաշտոնական Երևանի համար այդ պայմանագրի ստորագրումն ունի նախընտրական էական նշանակություն, էլեկտորատին որպես խաղաղության օրակարգի արդյունք ներկայացնելու համար: Ես կարծում եմ, որ Աբու Դաբիում խաղաղության պայմանագրի ստորագրման նշաններ չկան, կքննարկեն պայմանագրի ստորագրման պայմանները, իսկ թե ինչ համաձայնության կգան, պարզ կլինի հետագա հայտարարություններից կամ արտահոսքերից»,- Alpha News-ի հետ զրույցում ասաց Հակոբ Բադալյանը:

Նա պատահական չհամարեց, որ Փաշինյան-Ալիև հանդիպումը տեղի է ունենում արաբական հարթակում: Ըստ նրա՝ հանդիպման վայրը քննարկվել է Թուրիքայի՝ Էրդողանի միջնորդությամբ հունիսի 19-20-ին, երբ Ալիևն ու Փաշինյանը Թուրքիայում էին:

Հակոբ Բադալյանը ենթադրում է, որ Աբու Դաբիում Փաշինյանն ու Ալիևը կքննարկեն նաև այսպես կոչված Զանգեզուրի միջանցքի հարցը:

«Խաղաղության պայմանագրի ստորագրման համատեքստում քննարկվող առանցքային հարցերից մեկը վերաբերում է ճանապարհներին: Առնվազն վերջին 2-3 ամիսներին տեսնում ենք, որ բավական ինտենսիվ քննարկումներ կան այդ թեմայի շուրջ, Եվրամիությունից, Չինաստանից, Թուրքիայից հայտարարություններ կան: Անկասկած է, որ խաղաղության պայմանագրի ստորագրման պահանջներից մեկը լինելու է «միջանցքի» խնդիրը: Թուրքիան ու Ադրբեջանը, առավել ևս Թուրքիան, շահագրգռված է լինելու, որ ոչ միայն ռուսական, այլև որևէ վերահսկողություն չլինի և Թուրքիան հնարավորինս մեծ դեր ու ազդեցություն ունենա այդ ճանապարհների հարցում, բայց Անկարան անշուշտ այստեղ հակված կլինի պայմանավորվածությունների գալ այլ խոշոր խաղացողների հետ»,- հավելեց Հակոբ Բադալյանը: