Ղրիմում հայկական մշակույթի օրեր են անցկացվել
04 Օգոստոսի 2023, 00:10
![](https://media.alphanews.am/wp-content/uploads/2023/08/03115227/534d4f9b-27b2-45ea-b85f-16b9a9999e4c.jpg)
Ղրիմում անցկացվել են Հայկական մշակույթի օրեր: Տեղացիները ծանոթացել են հայ ժողովրդի հնագույն պատմությանը, հարուստ մշակույթին և ավանդույթներին:
armenianchurch.ru-ի փոխանցմամբ՝ Թեոդոսիա քաղաքի վարչակազմի, մշակույթի նախարարության և Թեոդոսիայի հայ համայնքի կազմակերպած միջոցառումներին մասնակցել են Ռուսաստանի տարբեր քաղաքների ներկայացուցիչներ:
Զապորոժյեն և Խերսոնի մարզը ներկայացնում էին հայկական համայնքների անդամները, մշակույթի նախարարության աշխատակիցներ ։
Սուրբ Սարգիս եկեղեցում, որի տարածքում գտնվում է Այվազովսկու գերեզմանը, վանահայր Տ. Տարոն վարդապետ Գուլիկյանի հանդիսապետությամբ մատուցվել է պատարագ:
Միջոցառման պատվավոր հյուրերին առաջարկվել է Այվազովսկու և նրա ժառանգության հետ ծանոթության ընդարձակ ծրագիր:
Սուրբ Խաչ վանական համալիրում կայացել է Հայ արվեստի միջտարածաշրջանային փառատոնը:
Ղրիմի Սիմֆերոպոլի Սուրբ Հակոբ եկեղեցու տարածքում տեղի է ունեցել 1915 թվականի Հայոց ցեղասպանության զոհերի հիշատակին նվիրված հուշարձանի մոտ ծաղիկների խոնարհում:
Նույն օրը մասնակիցները ծաղիկներ են դրել Սիմֆերոպոլի կենտրոնում գտնվող Այվազովսկի եղբայրների հուշարձանին: Այնուհետև տեղի է ունեցել հայ գրողների, հեղինակների և կազմողների գրքերի շնորհանդեսը, որոնք հրատարակվել են «Ի. Գասպրինսկովի անվան Մեդիակենտրոն»-ի կողմից:
Եվպատորիայի Սուրբ Նիկողայոս եկեղեցում հյուրերին դիմավորել է Տեր Ներսես քահանա Խանանյանը, որը խոսել է տաճարի պատմության և ներկա վիճակի մասին: Հյուրերը մասնակցել են Ճարտարապետ Պողոս Սեֆերովի 150-ամյակին նվիրված համաժողովին, այցելել հին քաղաքային գերեզմանատան հայկական հատված և ծաղիկներ խոնարհել անվանի ճարտարապետի շիրիմին, ում նախագծերով քաղաքում կառուցվել են ամենանշանավոր շենքերը՝ գրադարանը, թատրոնը և քաղաքային ղեկավարի տունը:
![](https://media.alphanews.am/wp-content/uploads/2023/08/03120718/7955c5e7-9898-4ae9-84ce-bca7101d78d5-1.jpg)
![](https://media.alphanews.am/wp-content/uploads/2023/08/03120725/e82a9b61-a0ea-4318-ac96-b4eaf00693af-1.jpg)