Յանա Եգորյանը՝ Մոսկվայի մարզի սուսերամարտի ֆեդերացիայի փոխնախագահ

Հայազգի սուսերամարտիկ, Ռուսաստանի կրկնակի չեմպիոն, աշխարհի կրկնակի չեմպիոն, Եվրոպայի թիմային առաջնության վեցակի չեմպիոն, Օլիմպիական խաղերի կրկնակի չեմպիոն, ՌԴ սպորտի վաստակավոր վարպետ Յանա Եգորյանն ընտրվել է Մոսկվայի մարզի սուսերամարտի ֆեդերացիայի փոխնախագահ: Այս մասին մարզուհին հայտնել է սոցցանցերում։

«Ավելի քան 20 տարի իմ կյանքն անքակտելիորեն կապված է սուսերամարտի հետ, և մինչ օրս ես ներկայացնում եմ Մոսկվայի մարզն ու Խիմկի քաղաքը տարբեր մակարդակի մրցումներում: Սպորտն ինձ համար ամեն ինչ է։ Եվ ես ամեն օր բոլոր ջանքերը գործադրում եմ Մերձմոսկվայում և ընդհանրապես Ռուսաստանում սուսերամարտի զարգացման համար:

Ինձ համար առաջնահերթություն է մանկական սպորտի զարգացումը: 2024 թվականից իրականացնում եմ Յանա Եգորյանի Գրան պրի շարքը: Մրցաշարեր են անցկացվում Խիմկիում, Տոլյատիում, Սանկտ Պետերբուրգում, Պենզայում, իսկ մասնակիցները մինչև 15 տարեկան երեխաներն են:

Անցյալ տարվա նոյեմբերին հաջողությամբ անցկացվել են Համառուսաստանյան մրցումներ օլիմպիական չեմպիոն Յանա Եգորյանի մրցանակների համար: Ավելի քան 300 աղջիկ և տղա պայքարել է հաղթանակի և արժեքավոր մրցանակների համար: Իհարկե, դեռ շատ աշխատանք կա անելու, և ամեն ինչ նոր է սկսվում: Շնորհակալություն եմ հայտնում բոլորին իմ թեկնածությունը պաշտպանելու համար։ Վստահ եմ, որ նոր պաշտոնում կկարողանամ օգտակար լինել մեր սիրելի սուսերամարտին»,- գրել է Եգորյանը։