Ընդունում են, որ դա ՀՀ ինքնիշխան տարածքն է, բայց «միջանցքի» անվտանգությունն է կարևոր.Ալիևի ներկայացուցիչ
16 Հոկտեմբերի 2023, 18:29
![](https://media.alphanews.am/wp-content/uploads/2023/10/16181846/4242.thumb_.jpg)
Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովը BBC-ին տված հարցազրույցում կրկին բարձրացրել է «Զանգեզուրի միջանցքի» թեման։ Ալիևի ներկայացուցիչը նշել է, թե իրենք ընդունում են, որ դա ՀՀ ինքնիշխան տարածքն է, բայց ակնկալվող «միջանցքով» անվտանգության հարցն են կարևորում։
«Մենք ընդունում ենք, որ դա Հայաստանի ինքնիշխան տարածքն է։ Բայց մեզ համար կարևոր է իմանալ՝ ինչպես է մյուս կողմն ապահովելու միջանցքով երթևեկության անվտանգությունը։ Մեզ անհրաժեշտ են հուսալի երաշխիքներ յուրաքանչյուր ուղևորի անվտանգության համար, ով գնացք կնստի՝ երթևեկելու Ադրբեջանի հիմնական հատվածից դեպի Նախիջևան կամ հակառակ ուղղությամբ»,- ասել է Ալիևի ներկայացուցիչը։
Ամիրբեկովի խոսքով՝ Բաքուն պատրաստ է բանակցությունների, բայց եթե Հայաստանը ձգձգի գործընթացը, ապա Ադրբեջանը պատրաստ է երթուղի կառուցել Իրանի տարածքով։
Ադրբեջանի նախագահի հատուկ հանձնարարություններով ներկայացուցիչը նաեւ հայտարարել է՝ Արցախն ստանալուց հետո իրենց մյուս կարևոր խնդիրը Հայաստանի հետ սահմանների դելիմիտացիան է։
Ամիրբեկովը քողարկված սպառնալիք է հնչեցրել՝ ասելով, որ եթե սահմանների հարցը լուծվի, «ռազմական գործողությունների վերսկսման հավանականությունն էլ կնվազի»։