Յուրի Սարգսյան․ Հայաստանի գիտության զարգացման մեջ կարևոր ներդրում ունեցած գիտնականը

Alpha News-ը շարունակում է ներկայացնել «Ալֆա պերսոնա» շարքը:

Փետրվարի 9-ը հայ գիտնական, ՀՀ ԳԱԱ ակադեմիկոս Յուրի Սարգսյանի ծննդյան օրն է։ Նա դարձավ 82 տարեկան։ Յուրի Լևոնի Սարգսյանը 1962 թվականին ավարտել է Երևանի պոլիտեխնիկական ինստիտուտի մեքենաշինական ֆակուլտետը, այնուհետև Մոսկվայի Քիմիական ճարտարագիտության ինստիտուտի ասպիրանտուրան՝ «Մեխանիզմներ, մեքենաներ և ավտոմատ գծերի տեսություն» մասնագիտությամբ։ Պաշտպանել է թեկնածուական ատենախոսություն Մոսկվայի պետական մեքենաշինական ինստիտուտում։

Արդեն 1967 թվականին եղել է ավագ դասախոս, ապա՝ դոցենտ, պրոֆեսոր, ամբիոնի վարիչ։ 1988 թվականին ընտրվել է Երևանի պոլիտեխնիկական ինստիտուտի ռեկտոր՝ այդ պաշտոնը զբաղեցնելով մինչև 2006 թվականը։

Բացի այդ, նա պաշտպանել է դոկտորական ատենախոսություն, իսկ 1977 թվականից դարձել պրոֆեսոր։

Սարգսյանի գլխավորությամբ Պոլիտեխնիկական ինստիտուտը վերակազմավորվել և վերանվանվել է Հայաստանի պետական ճարտարագիտական համալսարան, որը նույնպես անցել է եռաստիճան կրթական համակարգի։

Սարգսյանը մեխանիզմների սինթեզի տեսության մեջ հիմնել է բառացիորեն նոր ուղղություն՝ ապրոքսիմացիոն կինեմատիկական երկրաչափություն:
Ուղղության տեսական հիմքերը ուրվագծված են «Մեխանիզմների ապրոքսիմացիոն սինթեզ» մենագրությունում։

Յու.Սարգսյանը 1986թ. գիտական ծանակշիռ վաստակի համար ընտրվել է ՀՀ ԳԱԱ թղթակից անդամ, 1996թ-ին՝ իսկական անդամ։ 1989-2006 թթ. եղել է ՀՀ ԳԱԱ նախագահության անդամ, 1994թ. ընտրվել է ՀՀ ԳԱԱ փոխնախագահ։

Սարգսյանը գրել է ավելի քան 150 գիտական աշխատություն, այդ թվում՝ մենագրություններ։ Ստացել է 35 հեղինակային իրավունքի վկայական և գյուտերի արտոնագրեր:

Նա ՀՀ գիտության վաստակավոր գործիչ է, պարգևատրվել է նաև «Պատվո նշան» շքանշանով, «Անանիա Շիրակացի» մեդալով, «Սուրբ Մեսրոպ Մաշտոց» շքանշանով, ԼՂՀ «Երախտագիտություն» մեդալով։