Զախարովան խոսել է Հայաստան-ՆԱՏՕ հարաբերությունների մասին

ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Հարավային Կովկասում ՆԱՏՕ-ի հատուկ ներկայացուցիչ Խավիեր Կոլոմինայի հայտարարությունն այն մասին, որ ՆԱՏՕ-ում շատ ոգևորված են արտաքին պաշտպանական քաղաքականության հարցում Հայաստանի՝ դեպի հյուսիսատլանտյան դաշինք շարժվելու կապակցությամբ և որ ՆԱՏՕ-ն ավելի շատ մտերմություն է ցանկանում Հայաստանի հետ:

«Կարծում եմ՝ եթե ինչ-որ մեկը մտերմություն է ցանկանում, պետք է հասկանալ՝ որքանով է դա անվտանգ և ինչ հետևանքների կհանգեցնի: Մենք արդեն տեսել ենք՝ ՆԱՏՕ-ի հետ մտերմությունն ինչ հետևանքներ է ունենում շատ երկրների համար՝ ներքաշում հակամարտություններում, ինքնիշխանության և անկախության կորուստ… և ամենակարևորը՝ ազգային շահերին հետևելու հնարավորություն կորուստ:

Սակայն այս պարագայում պետք է վերլուծել՝ որոնք են Հայաստանի ազգային շահերը, պետք է բացել քարտեզը, տեսնել՝ որ տարածաշրջանում է գտնվում այդ երկիրը, ինչ հարևաններ ունի, պետք է պատմության դասագրքեր կարդալ նրանց համար, ովքեր կողմ են արտահայտվում այն մտերմության օգտին, որը հարաբերությունների խզում կամ առնվազն վատթարացում է ենթադրում տարածաշրջանների երկրների, հարևանների հետ», -ասել է Զախարովան:

Ըստ նրա՝ «այս ամենը պետք է վերլուծել ու հասկանալ՝ ինչն է բխում Հայաստանի ազգային շահերից, ինչն է կարճաժամկետ, միջնաժամկետ, երկարաժամկետ հեռանկարներում օգուտ բերում և ելնել այս ամենից, այլ ոչ թե կիսատ-պռատ խոսքերից, խոստումներից»։

Զախարովայի խոսքով՝ «Արևմուտքը բոլորին ամեն ինչ խոստանում է, սակայն խոստումները չի պահում»: