Հաղթանակի օրվա առթիվ Պուտինը շնորհավորել է մի շարք երկրների, այդ թվում՝ Հայաստանին
08 Մայիսի 2025, 14:45
Հայրենական մեծ պատերազմում Հաղթանակի 80-ամյակի կապակցությամբ ՌԴ նախագահ Վլադիմիր Պուտինը շնորհավորական ուղերձներ է հղել մի շարք երկրների ղեկավարներին ու քաղաքացիներին, այդ թվում՝ Հայաստանի: Այս մասին հայտնում է Կրեմլի մամուլի ծառայությունը։
«Հայրենական մեծ պատերազմում տարած հաղթանակի 80-ամյակի կապակցությամբ Ռուսաստանի Դաշնության նախագահ Վ. Վ. Պուտինը շնորհավորական ուղերձներ է հղել Հայաստանի, Ադրբեջանի, Բելառուսի, Ղազախստանի, Ղրղզստանի, Տաջիկստանի, Թուրքմենստանի, Ուզբեկստանի, Աբխազիայի, Հարավային Օսիայի, Իսրայելի առաջնորդներին, ինչպես նաև Վրաստանի և Մոլդովայի ժողովուրդներին», — ասվում է Կրեմլի հաղորդագրության մեջ:
Նախագահն ընդգծել է, որ երկրներում սրբորեն հարգում են հայրերի ու պապերի փառավոր սխրանքների ու մեծ զոհողությունների հիշատակը, որոնք ուս ուսի արիաբար մարտնչել են նացիստական զավթիչների դեմ և անձնվիրաբար աշխատել են թիկունքում:
«Մեր սրբազան պարտականությունն է զգուշորեն պահպանել հաղթող սերնդի ժառանգությունը։ Հետևաբար, շատ կարևոր է անզիջում կերպով ճնշել մեր ընդհանուր պատմությունը խեղաթյուրելու, նացիստների և նրանց հանցակիցների կողմից կատարված վայրագությունները սրբագրելու կամ մոռացության մատնելու ցանկացած փորձ»,- նշել է Պուտինը։
ՌԴ նախագահը շնորհավորանքներ և անկեղծ երախտագիտության խոսքեր է հղել Հայրենական մեծ պատերազմի վետերաններին և թիկունքի աշխատողներին, մաղթել նրանց քաջառողջություն, բարեկեցություն և երկար տարիների կյանք:
Հիմա եթերում
