Պատմական ճշմարտությունը շրջելն արվում է Հայաստանը ՌԴ-ից պոկելու նպատակով. Սերգեյ Պանտելեև

Ռուսաստանի արտասահմանյան ինստիտուտի տնօրեն, ռուս քաղաքագետ Սերգեյ Պանտելեևը Alpha News-ի հետ զրույցում մեկնաբանել է Հայրենական մեծ պատերազմի մասին Վ. Սարգսյանի անվան ռազմական ակադեմիայի հրամանատարաշտաբային ինստիտուտի պետ Արծրուն Հովհաննիսյանի հայտարարությունները Հանրային հեռուստատեսությանը տված հարցազրույցում, խոսել Մոսկվայում Հաղթանակի շքերթին հայ զինվորականների բացակայության, ինչպես նաև Ստամբուլում կայանալիք Ռուսաստանի և Ուկրաինայի բանակցությունների մասին:

Փորձագետի կարծիքով՝ պատմական ճշմարտությունը շրջելն արվում է Հայաստանը Ռուսաստանից պոկելու նպատակով։

«Ժամանակաշրջանը, որում հիմա ապրում ենք, բոլոր աշխարհաքաղաքական հակամարտությունների փոփոխությունների ժամանակաշրջանն է։ Մենք տեսնում ենք, որ մտքի պատերազմ է ընթանում: Ակնհայտ է, որ Ռուսաստանն ու Արևմուտքը հիբրիդային պատերազմի մեջ են, որտեղ պատմական հիշողության տարրը առանձին մարտադաշտ է։ Մենք արդեն տեսել ենք, թե ինչպես են մարդիկ սկզբում զարմանքով ընկալում, իսկ հետո ավելի ու ավելի են սկսում ընտելանալ պատմական ճշմարտությունը ներսից շրջելուն։ Սա մարդկանց մանիպուլյացիայի ենթարկելու տեխնոլոգիա է, և ես չէի ցանկանա, որ մեր եղբայրական Հայաստանում այդ տեխնոլոգիաները ունենային այն ազդեցությունը, որը մենք տեսնում ենք մեր եղբայրական Ուկրաինայում։ Ինձ թվում է, որ պետք է դիմել մեր հայ հեռուստադիտողներին և ասել՝ պետք չէ դյուրահավատ լինել, պետք չէ անլուրջ վերաբերվել նման հումանիտար հարցերին, քանի որ կա այսպիսի հրաշալի արտահայտություն. «Ով հիշողություն չունի, նա կյանք չունի:

Ակնհայտ է, որ այս ամենն արվում է մեկ նպատակով, որպեսզի Հայաստանը պոկեն Ռուսաստանից և հետո, մեր ժողովուրդներին իրար դեմ հանելով, օգտագործեն իրենց շահերի համար։ Նույնն, ինչ տեղի ունեցավ Ուկրաինայի հետ: Այլ նպատակներ ես այստեղ չեմ տեսնում։

Եվ ավելին, Թուրքիան նաև գործիք է այստեղ այլ խնդիրներ լուծելու համար, թեև իր շահն, իհարկե, ստանում է, բայց միևնույն է, դա արտաքին մանիպուլյացիայի գործիք է», — ընդգծել է Պանտելեևը։

Քաղաքագետի խոսքով՝ Մոսկվայում Հաղթանակի շքերթին հայ զինվորականների բացակայությունը խոսում է այն մասին, որ խնդիրներ կան:

«Կարծում եմ՝ շատերը զարմացան, որ հայերը չքայլեցին Կարմիր հրապարակում։ Շքերթի ոգին և տոնի ոգին ինքնին շեշտում էին, որ սա ընդհանուր հաղթանակ է: Ռուսաստանը, որպես Խորհրդային Միության իրավահաջորդ միջազգային բոլոր նորմերով, բնականաբար, կազմակերպիչն է այստեղ, բայց ընդգծում է, որ սա մեր ընդհանուր տոնն է, սա մեր ընդհանուր հաղթանակն է։ Եվ այդ պատճառով այդքան կարևոր էր տեսնել և՛ պետությունների ղեկավարներին, և՛ բանակի ներկայացուցիչներին։ Եվ եթե մենք այստեղ ինչ-որ բացակայություններ ենք տեսնում այս կամ այն ձևով, դա խոսում է այն մասին, որ կան խնդիրներ, որոնք բավական լուրջ են», — ասել է Պանտելեևը։

Ինչ վերաբերում է Ստամբուլում ընթացող բանակցություններին, ապա, փորձագետի կարծիքով, պետք չէ արագ արդյունքներ ակնկալել:

«Ես հաստատ ոչ մի կարճաժամկետ արդյունք չեմ կանխատեսում և համոզված եմ, որ դրանք հնարավոր չեն։ Մեր նպատակը երկարաժամկետ խաղաղությունն է, բայց այդ երկարաժամկետ խաղաղությունը, ինչպես ասում է Ռուսաստանի նախագահը, պետք է պատմական հեռանկար ունենա։ Այսինքն՝ մենք հանում ենք հակամարտության բուն պատճառը, իսկ հակամարտության բուն պատճառն այն է, որ Արևմուտքն Ուկրաինան վերածել է պլացդարմի՝ պայքարելու ոչ միայն Ռուսաստանի, այլև ողջ Եվրասիայի դեմ»,- նշել է Պանտելեևը։

Փորձագետը նաև գլոբալ անվտանգության համար մեծ ռիսկեր է տեսնում եվրոպական երկրների՝ արագացված ռազմականացման և Ռուսաստանի հետ պատերազմի նախապատրաստման ներկայիս ուղեգծում։

«Ես կարծում եմ՝ կան բոլոր պայմանները, որ մենք ընկղմվենք շատ անցանկալի սցենարի մեջ։ Երբ խաղաղապահությունը վերածվում է հակառակի, ապա այստեղ պետք է չափազանց զգույշ լինել և հասկանալ պատասխանատվության ողջ աստիճանը։ Ուստի մեծ հույսեր կան Ռուսաստանի և ԱՄՆ-ի և, հավանաբար, Չինաստանի միջև նորմալ հարաբերությունների համար։ Սրանք այն երեք ուժերն են, որոնք այսօր կարող են կանգնեցնել աշխարհը աղետի մեջ հայտնվելուց, որը կարող է լինել հսկայական ծախսերով», — եզրափակել է Պանտելեևը։