«Թրամփի նպատակը Մոսկվայի, Պեկինի հետ պայմանավորվելն է, Կիևն ածանցյալ հարց է». «2026. ի՞նչ է լինելու»
12 Հունվարի 2026, 20:00
Ուկրաինայում խաղաղություն հաստատելն ըստ քաղաքական մեկնաբան Հակոբ Բադալյանի, առանցքային չէ ԱՄՆ նախագահ Դոնալդ Թրամփի համար, որը 28 կետից բաղկացած խաղաղության պլան էր առաջարկել՝ Ռուսաստանի և Ուկրաինայի միջև 4-րդ տարին շարունակվող պատերազմը դադարեցնելու նպատակով: Բադալյանի գնահատմամբ, Սպիտակ տան ղեկավարի համար գլխավոր հարցը Ռուսաստանի և Չինաստանի հետ պայմանավորվածությունների հասնելն է, որն իր ազդեցությունն անշուշտ կունենա նաև ուկրաինական խնդրի վրա:
«ԱՄՆ ազգային անվտանգության նոր ռազմավարության մեջ ավելի կոշտ բնորոշումներ կան Եվրամիության հասցեին, քան օրինակ՝ Ռուսաստանի ու Չինաստանի: Այդ ռազմավարության մեջ Ռուսաստանն ու Չինաստանը չեն բնորոշվում որպես թշնամի կամ սպառնալիք, սա շատ էական հանգամանք է: ԱՄՆ-ի այս վարչակազմն այդ երկու երկրների հետ փորձում է ձևավորել այդ պայմանավորվածությունների ակումբը ու եթե այդ պայմանավորվածություններն ամբողջանան, ապա ուկրաինական հարցն ինքնաբերաբար լուծման ենթակա խնդիր է լինելու»,- Alpha News-ի՝ «2026. ի՞նչ է լինելու» նախագծի շրջանակում ասել է Հակոբ Բադալյանը:
Նրա համոզմամբ՝ Թրամփը իշխանությունը պահելու խնդիր ունի և իր դիրքերը պահելու հարցում չունի այլ աջակից, քան Ռուսաստանն ու Չինաստանն են:
«ԱՄՆ վարչակազմի համար Ռուսաստանն ու Չինաստանը շարունակելով լինել աշխարհաքաղաքական մրցակիցներ, նաև գործընկերներ են ընդհանուր փիլիսոփայության շուրջ համաձայնության գալու հարցում, այդ թվում՝ իր ներքին խնդիրները լուծելու տեսանկյունից: Թրամփն իմ գնահատմամբ, ձգտում է այս ամբողջական համաձայնություններին՝ համաշխարհային վերաբաժանումների ու կանոնների շուրջ և մենք տեսնում ենք այդ բանակցության պրոցեսը: ՌԴ նախագահի արտասահմանյան երկրների հետ ներդրումային և տնտեսական համագործակցության հարցերով հատուկ ներկայացուցիչ Կիրիլ Դմիտրիևի հետ ԱՄՆ-ում բանակցությունը չեմ կարծում, թե Ուկրաինայի հակամարտության վերաբերյալ է, պատերազմի մասին բանակցություն չի լինի ներդրումային և տնտեսական համագործակցության հարցերով բանագնացի հետ, հետևաբար դա վկայում է, որ Պուտին-Թրամփ երկխոսությունը գլոբալ օրակարգի շուրջ է, Ուկրաինան այդտեղ ածանցյալ է, որը ենթակա է լինելու այդ գլոբալ պայմանավորվածություններին»,- նշել է քաղաքական մեկնաբանը:
Հիմա եթերում
