Հայաստանի եվրոպական գործընկերները շահագրգռված են Ռուսաստանի հետ կապերի ապակազմակերպմամբ. Անդրեյ Արեշև

Քաղաքագետ, Ռազմավարական մշակույթի հիմնադրամի փորձագետ Անդրեյ Արեշևը Alpha News-ի եթերում մեկնաբանել է Փաշինյանի հայտարարությունները «Հարավկովկասյան երկաթուղի» ընկերության և երրորդ կողմին կոնցեսիայի հնարավոր փոխանցման մասին։

«Բոլորս լսել ենք Ռուսաստանի ԱԳՆ պաշտոնական ներկայացուցիչ Մարիա Զախարովայի մեկնաբանությունները Նիկոլ Փաշինյանի վերջին հայտարարությունների վերաբերյալ՝ կապված «Հարավկովկասյան երկաթուղու» հետ։ Փաստացի խոսքը Հայաստանում «Ռուսական երկաթուղիների» 100 տոկոսանոց դուստր ձեռնարկության մասին է, որը գտնվում է կոնցեսիոն կառավարման ներքո։ Իրավիճակը սկսել է զարգանալ ոչ երեկ և ոչ էլ նախօրեին. Հայաստանի իրավապահ մարմինների առաջին պահանջները հնչել են դեռևս 2019 թվականին։ Հիմա հարցը հնչում է մեկ այլ տեսանկյունից։

2025 թվականի դեկտեմբերին Սանկտ Պետերբուրգում կայացած հանդիպման ժամանակ Փաշինյանն, ինչպես ինքն է ասել, բարձրացրել է իրանական և հայ-թուրքական սահմանների սահմանակետերի շտապ վերակառուցման թեման, ինչը կհամապատասխաներ Հայաստանի ներկայիս իշխանությունների՝ Ադրբեջանի և Թուրքիայի հետ երկաթուղային հաղորդակցության ապաշրջափակման պլաններին։ Ռուսաստանի փոխվարչապետ Ալեքսեյ Օվերչուկի հայտարարությունների համաձայն՝ նման տարբերակը բացառված չէ։ Սակայն Փաշինյանն ավելի հեռուն է գնում և բացահայտ սպառնում է բարդ սխեմաներով կոնցեսիայի փոխանցմամբ։

Զուգահեռաբար Փաշինյանի հետ կապված տելեգրամյան ալիքներում տեղեկատվական արշավ է սկսվել Հայաստանի երկաթուղային ցանցի կառավարման իբր անարդյունավետության մասին։ Կարծում եմ, որ սա նպատակաուղղված գիծ է՝ ուղղված Հայաստանում ռուսական խոշոր ընկերությունների ներկայության նվազեցմանը, ինչն օբյեկտիվորեն խարխլում է ռուս-հայկական համագործակցության մնացած տարրերը և արագացնում Հայաստանի Հանրապետության աշխարհաքաղաքական դրեյֆը դեպի Ադրբեջան և Թուրքիա»,- նշել է փորձագետը։

Քաղաքագետի կարծիքով՝ Հայաստանի ներկայիս իշխանությունները հակված են քաղաքական երանգավորում տալ այն հարցերին, որոնք կարող էին լուծվել խաղաղ ճանապարհով և ընդհանուր գոհունակությամբ՝ առանց ավելորդ հույզերի և քաղաքականացված հայտարարությունների։

«Ինչպես գիտենք, Ռուսաստանի համար ներկայիս պայմաններում կարևոր է կառուցել արտաքին տնտեսական կապերը, դրանք շրջել դեպի Արևելք և Հարավ։ Այստեղից էլ Ռուսաստանի հետաքրքրությունը «Հյուսիս-Հարավ» միջազգային տրանսպորտային միջանցքի և այլ հաղորդակցությունների նկատմամբ։ Իմ կարծիքով՝ Հայաստանի ներկայիս կառավարությունը որոշակիորեն քաղաքականացնում է հարցերը, որոնք կարելի էր լուծել համընդհանուր գոհունակությամբ՝ առանց քաղաքական երանգավորված և էմոցիոնալ հայտարարությունների։

Կարծում եմ՝ սա ընդհանուր ռազմավարության մի մասն է, որը համակարգվում է նաև Հայաստանի եվրոպական գործընկերների հետ, որոնք առավելագույնս շահագրգռված են ապակազմակերպման տարրեր մտցնել ռուս-հայկական քաղաքական և տնտեսական կապերի, ինչպես նաև տնտեսվարող սուբյեկտների մակարդակով հարաբերությունների մեջ՝ այնտեղ, որտեղ դա հնարավոր է»,- ընդգծել է Արեշևը։