Արփինե Հովհաննիսյանը կոչ է անում դատարանում վիճարկել «Վեոլիա Ջուր» ընկերության գործունեությունը

ՀՀ արդարադատության նախկին նախարար Արփինե Հովհաննիսյանը ֆեյսբուքյան իր էջում տեսանյութ է հրապարակել՝ անդրադառնալով «Վեոլիա Ջուր» ընկերության աշխատանքին, մատակարարվող ջրի որակին և ջրամատակարարման գրաֆիկի պարբերական խախտումներին։

Նա նշել է, որ իր ուշադրության կենտրոնում գտնվող փորձագիտական խումբը պարբերաբար լաբորատոր փորձաքննության է ենթարկում խմելու ջուրը, և արդյունքները մտահոգիչ են։

Ըստ Հովհաննիսյանի՝ «ամառային շրջանում, երբ Գառնու աղբյուրների ջրի քանակը չի բավականացնում, ընկերությունը սկսում է ցանցին խառնել բարձր կոշտություն ունեցող արտեզյան ջուր, մասնավորապես՝ Արին Բերդի և Խարբերդի ջրամբարներից։ Արդյունքում՝ մի շարք բնակավայրերում ջրի կոշտության աստիճանը գերազանցում է Առողջապահության նախարարության սահմանած թույլատրելի նորմաները։

Արփինե Հովհաննիսյանը կոչ է արել քաղաքացիներին և իրավաբաններին համախմբվել և դատական կարգով վիճարկել այս գործընթացը։