Նոր Կոնգրեսը կսահմանափակի Թրամփի հնարավորությունները արտաքին քաղաքականության ոլորտում․ Ռաֆայել Օրդուխանյան

Քաղաքագետ, ամերիկագետ Ռաֆայել Օրդուխանյանը Alpha News-ի հետ զրույցում մեկնաբանել է ԱՄՆ Կոնգրեսի միջանկյալ ընտրությունների արդյունքները և դրանց հնարավոր ազդեցությունը Վաշինգտոնի ներքին ու արտաքին քաղաքականության վրա։

Փորձագետի կարծիքով՝ հանրապետականների պարտության հիմնական պատճառը ամերիկացի ընտրողների դժգոհությունն էր Դոնալդ Թրամփի վարած քաղաքականությունից, այլ ոչ թե Դեմոկրատական կուսակցությանը կամ լիբերալ օրակարգին աջակցելը։

«Ամերիկացիները քվեարկեցին Դոնալդ Թրամփի դեմ։ Ամերիկացիներին ընդունելի չեղան այն մեթոդները, որոնցով նա փորձում էր կարգուկանոն հաստատել՝ իր պատկերացումների և ցանկությունների համաձայն։ Նրա ձգտումները միանգամայն հասկանալի էին, սակայն, ըստ ամենայնի, այն ծայրահեղ միջոցները, որոնք Դոնալդ Թրամփը ժամանակին կիրառում էր Նյու Յորքում անշարժ գույքի ոլորտում իր բիզնեսը վարելիս, անընդունելի են ԱՄՆ ներքաղաքական օրակարգի համար։

Մենք գիտենք միգրացիոն ծառայության աշխատակիցների կողմից անօրինական միգրանտների, ինչպես նաև, ի դեպ, ԱՄՆ քաղաքացիների սպանության ողբերգական դեպքերի մասին։ Գիտենք նաև, թե ինչպիսի ցուցանիշներ են այսօր արձանագրվում տնտեսության մեջ։ Խոսքը վերաբերում է գնաճին, հսկայական բյուջետային դեֆիցիտին, պետական պարտքի ահռելի ծավալին և դրանց հետ կապված բոլոր խնդիրներին։

Այսպիսով, ճշմարտության պահը հասավ, և Դոնալդ Թրամփը ստացավ այն, ինչին արժանացել էր։ Փաստացի, ամերիկացիները Թրամփի վարչակազմին դատապարտեցին անփառունակ ավարտի։

Ինչ վերաբերում է MAGA շարժման հետագա ճակատագրին, ապա հանրապետականների պարտությունը դեռևս չի նշանակում MAGA շարժման ավարտ։ Դրա օրակարգն աստիճանաբար որդեգրում են այլ քաղաքական գործիչներ, առաջին հերթին՝ փոխնախագահ Ջեյ Դի Վենսը», — ասել է Օրդուխանյանը։

Անդրադառնալով ընտրությունների ազդեցությանը ԱՄՆ արտաքին քաղաքականության վրա՝ քաղաքագետը նշել է, որ առաջիկա երկու տարիներին Թրամփն, ամենայն հավանականությամբ, ստիպված կլինի կենտրոնանալ դեմոկրատների հետ քաղաքական հակամարտության վրա։ Միաժամանակ, նրա կարծիքով, քվեարկության արդյունքները բացասաբար կանդրադառնան ռուս-ամերիկյան հարաբերությունների վրա։

«Ներկայիս Կոնգրեսն ու Սենատը, անկասկած, ավելի կոշտ՝ բայդենյան ոճի հակառուսական, ես կասեի՝ ռուսատյաց քաղաքականություն են վարելու։ Մենք պետք է դա հստակ գիտակցենք։ Նման նախաձեռնություններն ու քաղաքական նոր մոտեցումները բազմաթիվ կլինեն, և դրանք բոլորը մեզ համար բացասական հետևանքներ կունենան։

Պարոն Դմիտրիևը ստիպված կլինի շատ ու շատ երկար սպասել ԱՄՆ-ի հետ իր ներդրումային ծրագրերի իրականացմանը։ Դա արդեն դառնում է հեռավոր ապագայի հարց», — ասել է Օրդուխանյանը։

Փորձագետի կարծիքով՝ ԱՄՆ Կոնգրեսը կկարողանա ազդել Ուկրաինային ցուցաբերվող աջակցության ծավալների վրա։ Մասնավորապես, դեմոկրատները կարող են ֆինանսավորման նկատմամբ իրենց վերահսկողությունն օգտագործել՝ Դոնալդ Թրամփի վարչակազմի արտաքին քաղաքական կուրսի վրա ներգործելու համար՝ անկախ նախագահի դիրքորոշումից։

«Կոնգրեսը կարող է աջակցել Ուկրաինային՝ անկախ Թրամփի դիրքորոշումից։ Սահմանադրության համաձայն՝ արտաքին քաղաքականության իրականացումը մնում է նախագահի վարչակազմի իրավասությունը, սակայն չմոռանանք, որ Կոնգրեսն է ԱՄՆ-ի ֆինանսական միջոցների տնօրինողը։ Հենց Կոնգրեսն է հաստատում այն ֆինանսական հատկացումները, որոնցով վճարվում են ամերիկյան զորքերի ծախսերը Իրանում, ինչպես նաև ֆինանսավորվում են ամենատարբեր պատժամիջոցային գործողությունները։

Հետևաբար, Կոնգրեսը, բնականաբար, անուղղակիորեն ազդելու է այդ գործընթացների վրա։ Ինչպե՞ս։ Դա լինելու է փոխզիջումների համակարգի միջոցով։ Թրամփը ստիպված կլինի որոշ հարցերում զիջումների գնալ Կոնգրեսի հակառուսական օրակարգին, իսկ դրա դիմաց Կոնգրեսն էլ նրան որոշակի ֆինանսավորման հարցերում ընդառաջ կգնա։

Սա քաղաքական այն հայտնի «պինգ-պոնգն» է, որով Ամերիկան զբաղվում է իր հիմնադրման օրվանից», — եզրափակել է Ռաֆայել Օրդուխանյանը։