Թեհրանը չի կարող թույլ տալ որևէ ոտնձգություն Իրան-Հայաստան սահմանին․ Ռոբերտ Բեգլարյան

Պատասխանելով Հայաստան հնդկական զենքի փոխադրման հարցում Իրանի տարանցիկ դերի մասին հարցին՝ Իրանը հերթական անգամ ընդգծեց իր դիրքորոշումը՝ նշելով, որ իրենք Հայաստանի հզորացման կողմնակիցն են։ Այս մասին Alpha News-ի ուղիղ եթերում ասաց Իրանի մեջլիսի պատգամավոր Ռոբերտ Բեգլարյանը։

«Իրանը իր դռները բացում է Հայաստանի առջև՝ թե՛ պաշտպանական, թե՛ տնտեսական և թե՛ դիվանագիտական բնագավառներում համագործակցելով։ Իրանը վստահ է, որ տարածաշրջանի հարցերը պետք է լուծվեն հենց տարածաշրջանի դերակատարների օգնությամբ։ Ցավոք, այսօր երկու երկիր հակառակ ձևով են աշխատում և այնպես են անում, որ տարածաշրջանում կայունություն չլինի։ Դրանք Ադրբեջանն ու Թուրքիան են։ Իրանը մտահոգված է, որ տարածաշրջանում կարող են այլ իրադարձություններ տեղի ունենալ»,- նշեց Բեգլարյանը։

Նա ընդգծեց՝ Թեհրանն ամեն բան կանի, որ Իրան-Հայաստան սահմանին կայունություն տիրի։

«Իրանի ռազմաքաղաքական և հետագա տնտեսական զարգացումները պետք է թույլ չտան, որ իր աշխարհագրական կապերը դեպի հյուսիս խաթարվեն, հատկապես այն պարագայում, որ Իրանի ամենավստահելի մասը Հայաստանով է անցնում։ Սա կենաց-մահու հարց է, և Իրանը չի կարող թույլ տալ որևէ ոտնձգություն Իրան-Հայաստան սահմանին»,- եզրափակեց Բեգլարյանը։