Տիգրան Պետրոսյան. Շախմատի արքան

Alpha News-ը շարունակում է ներկայացնել «Ալֆա պերսոնա» շարքը:

Հունիսի 17-ին միջազգային գրոսմայստեր, շախմատի աշխարհի չեմպիոն Տիգրան Պետրոսյանի ծննդյան օրն է։

Պետրոսյանը ծնվել է Թիֆլիսում։ Իր առաջին հաջողություններին հասել է քառասունականներին Համամիութենական պատանեկան առաջնությունում, այնուհետև դարձել Հայաստանի չեմպիոն և լրացրել ԽՍՀՄ սպորտի վարպետի կոչման նորման։ 1963 թվականին Տիգրան Պետրոսյանը դարձել է շախմատի աշխարհի չեմպիոն՝ հաղթելով Միխայիլ Բոտվիննիկին և 6 տարի անընդմեջ կրել շախմատի արքայի թագը։ Տարիների ընթացքում նա դարձել է բազմաթիվ միջազգային խոշոր մրցաշարերի և շախմատի համաշխարհային օլիմպիադաների հաղթող։

Տիգրան Պետրոսյանն ուներ ինքնատիպ ոճ, որտեղ ներդաշնակորեն համադրում էր հարձակումն ու պաշտպանությունը, ռազմավարությունն ու մարտավարությունը։ Նրա խաղերը պարունակում էին խորը գիտելիքներ, ճշգրիտ հաշվարկ և նուրբ ինտուիցիա:
«Սահմանափակել հակառակորդի հնարավորությունները, մշակել ռազմավարություն ամբողջ խաղատախտակի վրա, շրջապատել և աստիճանական սեղմել թշնամու թագավորի շուրջ օղակ»,- ասել է նա։

Տիգրան Պետրոսյանը եղել է «Շախմատային Մոսկվա» ամսագրի գլխավոր խմբագիրը, ապա՝ «64» ամսագրի հիմնադիրն ու գլխավոր խմբագիրը։ Այնուհետև «Սպարտակ» շախմատի ակումբային դպրոցում գիտելիքներ և փորձ է փոխանցել պատանի շախմատիստներին, ինչպես նաև զբաղվել է գիտական աշխատանքով։

Պետրոսյանի անունով են կոչվում Հայաստանի շախմատիստների կենտրոնական տունը և Ռուսաստանի մի քանի շախմատային ակումբներ։ Շախմատի ասպարեզում ունեցած ձեռքբերումների համար պարգևատրվել է Ժողովուրդների բարեկամության շքանշանով, «Պատվո նշան» և «Աշխատանքային արիության համար» մեդալով։ 1984 թվականից անցկացվում են Պետրոսյանի հիշատակին նվիրված մրցաշարեր, իսկ 1987 թվականին սահմանվել է Պետրոսյանի հիշատակի մեդալ։

Տիգրան Պետրոսյանը մահացել է 1984 թվականի օգոստոսի 13-ին Մոսկվայում և թաղվել հայկական գերեզմանատանը։