Ակցիաները Կառավարության շենք կհասնեն, եթե մեր պահանջը չկատարվի. Ողջաբերդի բնակիչները ճանապարհ են փակել

Այսօր Կոտայքի մարզի Ողջաբերդ գյուղի բնակիչները ճանապարհ են փակել` պահանջելով վերադարձնել գյուղի նախկին ղեկավար Աշոտ Մուշեղյանին։

Գյուղացիները պատմել են, որ նույն հարցով իրենց նախորդ բողոքի ակցիան արդյունք չի տվել, և իշխանությունները որևէ քայլ չեն ձեռնարկել հարցին լուծում տալու համար:

Ցուցարարները դեմ են նոր գյուղապետ Գրիգոր Մելքոնյանի նշանակմանը, որի հայրը ևս ժամանակին եղել է իրենց գյուղապետը։ Գյուղացիների պնդմամբ՝ նրա հայրը ժամանակին որևէ բան չի արել համայնքի համար, մինչդեռ Աշոտ Մուշեղյանը շատ բան է փոխել գյուղում։

Ցուցարարների խոսքով՝ բողոքի ակցիաները Կառավարության շենք կհասնեն, եթե իրենց պահանջը չկատարվի: