Առաջիկա 25 տարիներին Հայաստանը ԵՄ անդամ դառնալու հնարավորություն չունի․ Անդրանիկ Հովհաննիսյան
03 Հունիսի 2026, 20:03
Ես չեմ հանդիպել որևէ եվրոպացի փորձագետի, որը Հայաստանի՝ մոտ ապագայում Եվրամիությանն անդամակցելը իրատեսական կհամարեր։ Ավելին՝ խոսվում է այն մասին, որ Հայաստանը նման հնարավորություն չունի ոչ միայն մինչև 2030 թվականը, այլ նույնիսկ առաջիկա 20-25 տարիների ընթացքում։ Այս մասին Alpha News-ի հետ զրույցում ասել է քաղաքագետ Անդրանիկ Հովհաննիսյանը։
«Եվրոպացի փորձագետների այդ գնահատականը պայմանավորված է այն հանգամանքով, որ ԵՄ անդամակցության հերթում արդեն երկար տարիներ սպասում են մի շարք երկրներ, այդ թվում՝ Մոնտենեգրոն ու Ալբանիան»,- նշել է քաղաքագետը:
Հովհաննիսյանի խոսքով՝ դժվար է պատկերացնել, թե ինչպես Հայաստանը կարող է արագ անդամակցել Եվրամիությանը, երբ անդամակցության թեկնածու այլ երկրներ շարունակում են սպասել իրենց հերթին։
«Անդամակցության ճանապարհին առկա է նաև մեկ այլ կարևոր խոչընդոտ։ Հայկական արտադրանքի ստանդարտները ներկայումս համապատասխանում են Եվրասիական տնտեսական միության պահանջներին և չեն համապատասխանում Եվրոպական միության չափանիշներին»,- ընդգծել է քաղաքագետը։
Անդրանիկ Հովհաննիսյանի խոսքով՝ այդ ստանդարտների փոփոխությունը երկարատև և ծախսատար գործընթաց է, որը պահանջում է զգալի ֆինանսական ռեսուրսներ։
Հիմա եթերում
