Ախալքալաքում նշել են Սուրբ Զատիկը

Ախալքալաքում Հայ Առաքելական եկեղեցու բոլոր հավատացյալները նշել են Զատիկը՝ Հիսուս Քրիստոսի հրաշափառ Հարության տոնը: Այս տոնը տարվա ՀԱԵ-ի 5 հիմնական տոներից մեկն է:

Ինչպես հայտնում է jnews.ge-ն, Ախալքալաքի Սուրբ Խաչ եկեղեցում Հարության տոնական պատարագը մատուցել է Սամցխե-Ջավախքի և Ծալկայի ընդհանուր առաջնորդական փոխանորդ Տեր Նշան վրդ. Հմայակյանը։

Եկեղեցում պատարագից հետո տեղի է ունեցել հավկիթների օրհնման արարողություն և դրանք բաժանվել են հավատացյալներին:

Զատկի տոնական սեղանի պարտադիր մաս են կազմում՝ ներկված հավկիթները, կանաչին, բրնձով-չամիչով փլավը, ձուկն ու գինին: Ձուն հարության և նոր կյանքի սկզբնավորման խորհրդանիշն է, իսկ կարմիր գույնը խորհրդանշում է խաչված Քրիստոսի, մարդկանց փրկության համար թափված արյունը: