Այսօր երեկոյան կգնանք Մայր Աթոռ Վեհափառից օրհնություն ստանալու համար. Աննա Գրիգորյան

Ազգային ժողովի «Հայաստան» խմբակցության պատգամավոր Աննա Գրիգորյանը, անդրադառնալով խորհրդարանում ընդդիմության հետագա գործունեությանը, հայտարարեց, որ իրենց գլխավոր նպատակը փոփոխության ենթակա չէ։

«Մենք, Ազգային ժողով գալով, հայտարարել ենք, որ հիմնական օրակարգը շարունակում է լինել այս իշխանությունների հեռացումը։ Ազգային ժողովը դիտարկում ենք ընդամենը որպես հերթական հնարավորություն, հարթակ՝ մեր դիրքորոշումները հնչեցնելու և մարդկանց հետ շփվելու տեսանկյունից։ Մեծ ակնկալիքներ, բնականաբար, չկան»,- նշեց պատգամավորը։

Անդրադառնալով Ազգային ժողովի նիստին Ամենայն Հայոց Կաթողիկոսին չհրավիրելու փաստին՝ Աննա Գրիգորյանը դա որակեց որպես աննախադեպ իրավիճակ.

«Սա գնահատում եմ այն ամենի համատեքստում, ինչ անում է իշխանությունը՝ մասնավորապես իր նախընտրական ծրագրում ամրագրելով Կաթողիկոսի հրաժարականի խնդիրը։ Հետևաբար տրամաբանական էր, որ այսօր իրենք չէին կարող հրավիրել Ամենայն Հայոց Կաթողիկոսին։ Սա աննախադեպ իրավիճակ է, որովհետև խորհրդարանը Վեհափառի կողմից օրհնություն չստացավ»,- հավելեց նա՝ տեղեկացնելով, որ երկու ընդդիմադիր խմբակցություններն էլ երեկոյան այցելելու են Մայր Աթոռ Սուրբ Էջմիածին՝ Կաթողիկոսի օրհնությունը ստանալու համար։