Բասկերի երկրի խորհրդարանում լսումներ են անցկացվել Լեռնային Ղարաբաղում տիրող իրավիճակի վերաբերյալ

Բասկերի երկրի խորհրդարանի եվրոպական հարցերի և արտաքին գործերի հանձնաժողովը լսումներ է անցկացրել Լեռնային Ղարաբաղում տիրող իրավիճակի վերաբերյալ, որի ընթացքում իսպանահայ իրավաբան Լևոն Գրիգորյանը տեղեկացրել է Լեռնային Ղարաբաղում տիրող իրավիճակի մասին։

«Անկախ մեր ծագումից՝ կարևոր է, որ մենք միավորվենք այս ընդհանուր գործում: Էթնիկ զտումներն ուղղակի ոտնձգություն են մարդկային արժանապատվության և ամենահիմնական իրավունքի` կյանքի իրավունքի նկատմամբ: Լեռնային Ղարաբաղի բնակչության իրավունքները միջազգայնորեն պաշտպանության կարիք ունեն, իսկ Լեռնային Ղարաբաղի կարգավիճակը չի կարող որոշվել Ադրբեջանի կողմից սկսված պատերազմով»,- ասել է իրավաբանը։

Գրիգորյանը հանդես է եկել Ադրբեջանի իշխանությունների կողմից մարդկության դեմ կատարված հանցագործությունների անկախ հետաքննության օգտին՝ պնդելով, որ այս իշխանությունների դեմ պատժամիջոցների կիրառումը վճռորոշ է Հայոց նոր ցեղասպանության հնարավորությունը կանխելու համար։