«Էլպար» հայկական ժողովրդական պարի համույթը՝ միջազգային օլիմպիադայի հաղթող

Երևանի Կ. Ս. Ստանիսլավսկու անվան ռուսական դրամատիկական թատրոնում անցկացվել է «Ուռենի» միջազգային օլիմպիադան, որին մասնակցել են տարբեր քաղաքներից և երկրներից ժամանած տաղանդավոր պարային համույթներ։

Հեղինակավոր մրցույթում Սոչի քաղաքը պատվով ներկայացրել է հայկական ժողովրդական պարի «Էլպար» («Elpar») համույթը՝ Էլինե Ավետիսյանի ղեկավարությամբ։

Օլիմպիադայում համույթն առաջին տեղն է զբաղեցրել միանգամից երկու անվանակարգում։ Բարձր կատարողական վարպետության համար այն պարգևատրվել է գավաթով և դիպլոմներով։

Հատուկ պարգևի է արժանացել նաև համույթի գեղարվեստական ղեկավար Էլինե Ավետիսյանը։ Նա շնորհակալագիր է ստացել բարձր պրոֆեսիոնալիզմի, իր գործին նվիրվածության և հայկական պարարվեստի զարգացման գործում ունեցած նշանակալի ավանդի համար։