Էրդողանն ու Թրամփը հեռախոսազրույց են ունեցել

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ԱՄՆ նախագահ Դոնալդ Թրամփի հետ՝ կոչ անելով շարունակել Իրանի հետ բանակցությունները՝ երկու երկրների միջև լարվածությունը թուլացնելու նպատակով։ Նա նաև առաջարկել է Անկարայի աջակցությունը խաղաղության հաստատմանն ուղղված ջանքերին։ Այս մասին հայտնել են Թուրքիայի նախագահի աշխատակազմից։

Թուրքիան, որն ունի ՆԱՏՕ-ի կազմում երկրորդ խոշորագույն բանակը և սահմանակից է Իրանին, բազմիցս կոչ է արել դադարեցնել պատերազմը։ Անկարան սերտ կապեր է պահպանում ԱՄՆ-ի, Իրանի, ինչպես նաև այնպիսի միջնորդների հետ, ինչպիսիք են Պակիստանն ու Կատարը, և հանդես է գալիս կողմերի միջև միջնորդի դերում։

«Էրդողանը նշել է, որ չափազանց կարևոր է առավելագույնս օգտագործել Իրանի և Միացյալ Նահանգների միջև լարվածության կարգավորման դիվանագիտական հնարավորությունները։ Նա ընդգծել է, որ հույս ունի բանակցությունների շարունակության վրա, և որ Թուրքիան կշարունակի աջակցել խաղաղության հաստատմանն ուղղված ջանքերին», — ասվում է Թուրքիայի նախագահի աշխատակազմի հայտարարության մեջ, փոխանցում է Reuters-ը։

Նախագահի աշխատակազմից նաև հայտնել են, որ Էրդողանն ու Թրամփը քննարկել են երկկողմ հարաբերությունները, Գազայում ընթացող պատերազմը, ինչպես նաև Թուրքիայի, Սաուդյան Արաբիայի և Պակիստանի միջև ստորագրված պաշտպանական համաձայնագիրը։ Էրդողանը բարձր է գնահատել համաձայնագիրը՝ այն անվանելով տարածաշրջանային կայունության և անվտանգության հարցում «հաստատակամ դիրքորոշման» դրսևորում։

Հաղորդագրության համաձայն՝ Էրդողանը Թրամփին նաև տեղեկացրել է պաղեստինցիների դեմ իսրայելական հարձակումների ակտիվացման մասին՝ այն ժամանակ, երբ պետք է ուժի մեջ մտներ Գազայի վերաբերյալ Թրամփի խաղաղության ծրագրի երկրորդ փուլը։