Գլենդելում ջրի սակագինը կարող է թանկանալ մինչև 145 տոկոս․ Գևորգ Գրիգորյան
08 Սեպտեմբերի 2026, 23:20
Գլենդելում ջրի սակագնի նախատեսվող բարձրացումը կարող է կազմել 50-ից մինչև 145 տոկոս։ «Alpha News»-ի տաղավարում այս մասին ասել է հասարակական-քաղաքական գործիչ Գևորգ Գրիգորյանը՝ ներկայացնելով Գլենդելի բնակիչների մտահոգությունն ու դրա դեմ իրականացվող նախաձեռնությունը։
Նրա խոսքով՝ Գլենդելի քաղաքային խորհուրդը վերջերս տեղի ունեցած նիստում ընդունել է ջրի սակագների բարձրացման վերաբերյալ որոշում։ Սակայն, ըստ նրա, Կալիֆոռնիայի օրենսդրությունը բնակիչներին թույլ է տալիս վիճարկել նման որոշումները։
«Մենք հիմա կանգնած ենք լուրջ խնդրի առաջ․ ջրամատակարարման սակագինը կարող է թանկանալ 50-ից մինչև 145 տոկոսով։ Սակայն Կալիֆոռնիայում գործում է օրենք, որը բնակիչներին թույլ է տալիս բողոքարկել նման որոշումները»,- նշել է Գրիգորյանը։
Նրա փոխանցմամբ՝ արդեն սկսվել է ստորագրահավաք։ Բնակիչներին առաջարկվում է լրացնել հատուկ ձևաթղթեր՝ իրենց դիրքորոշումն արտահայտելու համար։
«Մենք արդեն սկսել ենք բողոքի ակցիան և ստորագրություններ ենք հավաքում։ Մեր ձևաթուղթը հաստատում է, որ տվյալ անձը դեմ է սակագնի բարձրացմանը և միանում է մեր նախաձեռնությանը»,- հավելել է նա։
Հիմա եթերում
