Գնալու ենք մինչև վերջ, որ ապօրինի որոշումը կասեցվի. Գառնիկ Դանիելյանը՝ ջավախահայերին տուգանելու մասին
06 Փետրվարի 2025, 22:30
ՀՀ ԱԺ «Հայաստան» խմբակցության պատգամավոր Գառնիկ Դանիելյանը հայտնել է, որ Հայաստանի Հանրապետությունում երկքաղաքացիություն ունեցող, սակայն վրացական անձնագրով ու վարորդական վկայականով երթևեկող ջավախահայերը զանգվածաբար տուգանվում են։
Ֆեյսբուքյան իր էջում պատգամավորը գրել է, որ իրեն դիմել են բազմաթիվ ջավախահայեր՝ բարձրաձայնելով իրավիճակը։ Ըստ պատգամավորի՝ շատ ջավախահայեր վերջին տարիներին երկքաղաքացիություն են ստացել, սակայն Հայաստան մուտք են գործում վրացական անձնագրով և վարորդական վկայականով։ ՀՀ պարեկային ծառայությունն այս դեպքերում նրանց տուգանում է՝ գործող օրենսդրության պահանջներից ելնելով։
Alpha News-ը թեմայի վերաբերյալ զրուցել է հենց Գառնիկ Դանիելյանի հետ:
«Չեմ կարող հստակ թվերով ներկայացնել, թե քանի ջավախահայ է տուգանվել, բայց հարցում եմ ուղարկել, որի պատասխանը դեռ չի եկել: Սակայն պետք է նշել, որ խնդիրը քանակի մեջ չէ, այլ մոտեցման: Հայաստանը պետք է ամեն ինչ անի, որ Վրաստանում ապրող իր հայրենակիցները կարողանան անարգել մուտք գործել ՀՀ, և դրա համար չենթարկվեն տուգանքի ու ընկնեն քաշքշուկների մեջ: Հիմա ասում են՝ հնարավորություն կընձեռվի մեկ ամիս երթևեկելու, բայց այդ մեկ ամիսն էլ նախ քիչ է, ու խնդրի լուծում չէ: Ես առաջարկ եմ ներկայացրել, որ մարդիկ երթևեկեն այն կարգով, որը թույլ կտա մեր հայրենակիցներին առանց որևէ սահմանափակման Հայաստանում մեքենա վարեն հենց վրացական վարորդական վկայականով: Սա միջազգային պրակտիկա է, և տարբեր երկրներում նշված կարգը գործում է, ու այս պարագայում պետք է այն գործի նաև մեր երկրում»,- նշել է Դանիելյանը:
Պատգամավորն ընդգծել է, որ նման խնդիրների բախվելով ՝մարդիկ իրենց օտարված են համարում հայրենիքից:
«Ինձ հետ զրույցում մարդիկ նշել են, որ այդ վարորդականով կարողանում են երթևեկել և՛ Եվրոպայում, և՛ հարևան երկրներում: Աբսուրդ է, եթե մեր հայրենակիցները նույն վարորդականով կարողանում են այլ երկրում երթևեկել, ապա խնդիրն ինչո՞ւմ է, որ ՀՀ-ում չեն կարող ու պրոբլեմ է առաջանում: Այս հարցով մենք գնալու ենք մինչև վերջ, որպեզի ապօրինի որոշումը կասեցվի: Սա ոչ միայն քաղաքական հարց է, այլև բարոյական: Այս խնդիրը պետք է անհապաղ լուծվի, և մենք այդ առումով բոլոր գործիքակազմն օգտագործելու ենք: Նման խնդիրների բախվելով՝ մարդիկ իրենց օտարված են համարում հայրենիքից: Տարատեսակ արգելքներ է կիրառվում և հարց է առաջանում՝ ինչո՞ւ է դա արվում, միգուցե, որ մեր հայրենակիցները չկարողանա՞ն Հայաստան մուտք գործել«- եզրափակել է Դանիելյանը:
Հիմա եթերում
