Հայաստանի ներկայիս ղեկավարության քաղաքականությունը երկու աթոռի վրա նստելու փորձ է․ Բոգդան Բեզպալկո

Քաղաքագետ Բոգդան Բեզպալկո-ն Alpha News-ին տված մեկնաբանության ընթացքում անդրադարձել է հայ-ռուսական հարաբերությունների հեռանկարներին՝ ընդգծելով, որ դրանց ապագայի վերաբերյալ բավականին թերահավատ է տրամադրված։

«Հայաստանի ղեկավարությունը փորձում է երկու աթոռի վրա նստել։ Տնտեսական առումով այն ցանկանում է պահպանել բոլոր այն արտոնություններն ու առավելությունները, որոնք տալիս է Եվրասիական տնտեսական միություն-ը՝ ցածր գներով էներգակիրներ, ռուսական շուկա, ռուսական աշխատաշուկա, ինչպես նաև ԵԱՏՄ մյուս երկրների հետ առանց վիզաների, մաքսատուրքերի և այլ խոչընդոտների առևտրաշրջանառություն։ Միևնույն ժամանակ քաղաքական և ռազմական ոլորտներում Հայաստանի ղեկավարությունը կողմնորոշվում է դեպի Արևմուտք։ Թե ինչի կհանգեցնի նման քաղաքականությունը, մեծապես կախված է Ռուսաստանի ղեկավարությունից։ Եթե արձագանքը բավականաչափ կոշտ լինի, ապա մի կողմից Ռուսաստանը կարձանագրի ինտեգրացիոն միության անդամներից մեկի կորուստը, իսկ մյուս կողմից ցույց կտա բոլորին, թե ինչ հետևանքներ կարող է ունենալ Եվրասիական տնտեսական միությունից դուրս գալը»,– նշել է Բեզպալկոն։

Փորձագետի խոսքով՝ Հայաստանը փորձում է պահպանել ԵԱՏՄ-ի ընձեռած տնտեսական առավելությունները, սակայն քաղաքական առումով ուղղվում է դեպի Արևմուտք։

«Օրինակ՝ Հայաստանը գյուղատնտեսական երկիր է։ Այն Ռուսաստան է արտահանում մրգեր և բանջարեղեն, որոնք կազմում են արտահանման ընդհանուր ծավալի մոտ 95-96 տոկոսը։ Ո՞վ կարող է փոխարինել այդ շուկան՝ Ֆրանսիան, Գերմանիան, թե որևէ այլ երկիր։ Ես դրա վերաբերյալ լուրջ կասկածներ ունեմ։ Նույնը վերաբերում է նաև այլ արտադրանքին, ինչպես նաև այն մարդկանց, որոնք աշխատանք են գտնում Ռուսաստանի Դաշնության տարածքում։ Ընդհանուր առմամբ, ես շատ թերահավատորեն եմ գնահատում Ռուսաստանի և Հայաստանի հարաբերությունների զարգացման հեռանկարները։ Մյուս կողմից, ինձ համար ամբողջովին պարզ չէ, թե դրանք ինչպես կզարգանան՝ կտրուկ, թռիչքաձև փոփոխություններով, թե աստիճանաբար վատթարանալով մինչև այն մակարդակը, որն այսօր առկա է Ռուսաստանի և Ուկրաինայի հարաբերություններում։ Սակայն, իմ կարծիքով, վերջնական հանգրվանը հենց այդպիսին կլինի»,– ասել է Բեզպալկոն։