Հիմա դժվար է խոսել Թուրքիայի և Ռուսաստանի հարաբերությունների մասին, կան տարաձայնություններ. Դմիտրի Բրիջ

Թուրքագետ, RIAC փորձագետ Դմիտրի Բրիջը Alpha News-ի եթերում մեկնաբանել է Սոչիում Ռուսաստանի և Թուրքիայի նախագահների հանդիպումը.

«Եթե խոսենք Էրդողանի և Պուտինի հանդիպման մասին, ապա կարող ենք նկատել հետևյալը. մինչ այժմ կողմերի միջև պայմանավորվածություններ չեն եղել ո՛չ հացահատկի գործարքի, ո՛չ էլ Ռուսաստանի և Թուրքիայի միջև ծրագրված այլ նախագծերի վերաբերյալ, օրինակ՝ գազի հանգույց և այլն: Կարեւոր է նշել, որ սա առաջին հանդիպումն է Ռեջեփ Թայիփ Էրդողանի՝ նախագահի պաշտոնում վերընտրվելուց հետո։ Արեւմուտքում շատերն են նկատել, որ այն հույսերը, որ ունեին արեւմտյան գործընկերները, թե Թուրքիան կհրաժարվի Ռուսաստանից եւ կհայտնվի Արեւմուտքի կողքին, չարդարացան»,- ասել է թուրքագետը։

Ըստ փորձագետի՝ Ռուսաստանը և Թուրքիան կարևոր գործընկերներ են։

«Թուրքիան դեռևս կարևոր գործընկեր է Ռուսաստանի համար, ինչի մասին վկայում է հանդիպման վայրից հայտարարությունն այն մասին, որ երկու երկրների միջև ապրանքաշրջանառությունն աճել է։ Թուրքիան տառապում է, ունի տնտեսական խնդիրներ, բայց պետք է Ռուսաստանին։

Բազմաթիվ զբոսաշրջիկներ են գալիս Ռուսաստանից Թուրքիա, շատ ռուսներ ներդրումներ են կատարում Թուրքիայում, և Ռուսաստանին անհրաժեշտ է նաև Թուրքիան՝ պատժամիջոցները շրջանցելու համար»,- ասել է Բրիջիթը։

Թուրքագետի խոսքով՝ այժմ դժվար է խոսել Թուրքիայի և Ռուսաստանի հարաբերությունների մասին, քանի որ, իհարկե, կան տարաձայնություններ։

«Մենք նկատում ենք, որ Թուրքիան դեմ է գնում Ռուսաստանի քաղաքականությանը, դա վերաբերում է Ղրիմի խնդրին, Ուկրաինային Թուրքիայի աջակցության խնդրին, Ուկրաինայի տարածքում թուրքական ընկերության կողմից «Բայրաքթար» անօդաչու թռչող սարքերի գործարանի կառուցման հարցին եւ այլն։ Այս ամենը հարաբերություններում որոշակի խնդիրներ է ստեղծում։ Տարաձայնություններ կան նաեւ Սիրիայի հարցում, Թուրքիան դեռ չի կարողացել իր խնդիրները լուծել Բաշար Ասադի, սիրիական իշխանության հետ։

Բայց չնայած այս ամենին՝ ապրանքաշրջանառությունն ավելացել է, երկու երկրների միջև կան իրականացնելու տարբեր ծրագրեր, և, իհարկե, այս փուլում դա ձեռնտու է և՛ Թուրքիային, և՛ Ռուսաստանին»,- եզրափակել է Դմիտրի Բրիջը։