Կրակոցներ Երևանում․ վիրավորը ծայրահեղ ծանր վիճակում է

Հոկտեմբերի 2-ին՝ ժամը 17:10-ի սահմաններում, արտակարգ դեպք է տեղի ունեցել Երևանում: «103» շտապօգնության հերթապահ խումբը Մինաս Ավետիսյան 2-րդ հասցեից հրազենային վնասվածքով «Միքայելյան» վիրաբուժության ինստիտուտ է տեղափոխել մի տղամարդու:

Ինչպես հայտնում է ֆոտոլրագրող Գագիկ Շամշյանը, բուժանձնակազմը տեղում առաջին օգնություն ցուցաբերելուց հետո տուժածին ծայրահեղ ծանր վիճակում տեղափոխել է հիվանդանոց: Ըստ նախնական տեղեկությունների՝ տղամարդն աջ ազդրի շրջանում հրազենային վնասվածք ունի:

Դեպքի վայր և հիվանդանոց են մեկնել ՀՀ ՆԳՆ ոստիկանության համայնքային ոստիկանության գլխավոր վարչության Քանեռ-Զեյթունի բաժնի և քրեական ոստիկանության Երևան քաղաքի վարչության ծառայողները: Բժիշկները правоապահներին տեղեկացրել են, որ վիրավորն ի վիճակի չէ բացատրություն տալու, քանի որ գտնվում է վիրահատարանում:

Այս պահին ոստիկանության ծառայողները ձեռնարկում են անհրաժեշտ օպերատիվ-հետախուզական միջոցառումներ՝ տուժածի ինքնությունը, դեպքի հստակ վայրը, հանցագործության հանգամանքները պարզելու, ինչպես նաև ենթադրյալ հանցագործին և հանցագործության գործիք հանդիսացող հրազենը հայտնաբերելու ուղղությամբ:

Դեպքի վայրի ճշգրտումից հետո համապատասխան տեղեկատվությունը փոխանցվելու է ՀՀ քննչական կոմիտեի տարածքային քննչական բաժին: