Մարգար Սեդրակյան․ Կոնյակի արտադրության արքան

Alpha News-ը շարունակում է ներկայացնել «Ալֆա պերսոնա» շարքը:

Մարտի 31-ը հայտնի տեխնոլոգ, հայկական կոնյակի հիմնադիր Մարգար Սեդրակյանի ծննդյան օրն է։

Մանուկ հասակում Սեդրակյանը վերապրել է Հայոց ցեղասպանությունը։ Դպրոցն ավարտել է մանկատանը։ 1930 թվականին ավարտել է Երևանի գյուղատնտեսական ինստիտուտը։

Արդեն 1927 թվականից նա աշխատել է հայկական կոնյակի նոր տեսակների ստեղծման վրա, որոնք համաշխարհային հռչակ են բերել կոնյակի արտադրությանը։

1935 թվականից Սեդրակյանը դարձել է Համտեսի (դեգուստացիոն) կենտրոնական հանձնաժողովի անդամ։

Երկրորդ համաշխարհային պատերազմի ժամանակ զորակոչվել է բանակ, ստացել ոտքի բեկորային վիրավորում։ Հուլիսին հիվանդանոցում բուժվելուց հետո զորացրվել է բանակից և վերադարձել Հայաստանի մայրաքաղաք՝ շարունակելու իր աշխատանքը սիրելի բնագավառում։

1940-1948 թթ դասավանդել է Երևանի գյուղատնտեսական ինստիտուտում։

Մարգար Սեդրակյանը կոնյակի պատրաստման նոր տեխնոլոգիայի հիմնադիրն է ոչ միայն Հայաստանում, այլև ԽՍՀՄ-ում։

Սեդրակյանի ստեղծած կոնյակները բազմիցս արժանացել են ոսկե մեդալների համամիութենական և համաշխարհային մրցույթներում։

1966 թվականին Մարգար Սեդրակյանին շնորհվել է «Կոնյակագործության բարձրագույն վարպետ» պատվավոր կոչում։

Տեխնոլոգն արժանացել է ֆրանսիական «Կամյու» կոնյակի տան բարձրագույն պարգևի՝ «Համտեսի ասպետ» մեծ արծաթե մեդալի։