Մարզական մեկնաբան Ռոբերտ Գասպարյանը ներկայացրել է Հայաստանը FIFA THE BEST-ի քվեարկությանը

Մարզական լրագրող, մեկնաբան Ռոբերտ Գասպարյանը ներկայացրել է Հայաստանը FIFA THE BEST՝ 2023 թվականի լավագույն ֆուտբոլիստի քվեարկությանը: Ռոբերտը քվեարկել է տարվա լավագույն ֆուտբոլիստ, մարզիչ և դարպասապահ անվանակարգերում: Նրա կարծիքով անցնող տարվա լավագույն ֆուտբոլիստի կոչումը պետք է ստանա «Մանչեսթեր Սիթիի» հարձակվող Էրլինգ Հոլանդը: Լավագույն մարզչի քվեն Գասպարյանը տվել է «Սիթիի» ղեկին կանգնած Պեպ Գվարդիոլային, իսկ լավագույն դարպասապահ անվանակարգում նրա ֆավորիտը նույն թիմի ներկայացուիչ Էդերսոնն է: Իր ընտրությունը Ռոբերտ Գասպարյանը մեկնաբանել է այսպես.

«Ժամանակակից ֆուտբոլում անհատական մրցանակների հանդեպ վերաբերմունքը փոխվել է, քանի որ 21-րդ դարում ֆուտբոլն է մի փոքր փոխվել: Մարզաձևի՝ ավելի մեխանիկացված դառնալը զրկում է վառ խաղացողներին փայլել իրենց անհատական վարպետությամբ:

Այդ տեսանկյունից առաջին պլան են գալիս թիմային մրցանակներն ու գոլերը: Այստեղ ֆավորիտն, իհարկե «Մանչեսթեր Սիթին» է` իր ռմբարկու Էրլինգ Հոլանդով, մարզիչ Պեպ Գվարդիոլայով ու դարպասապահ Էդերսոնով: Անգլիական ակումբը բաղձալի թրեբլ գրանցեց՝ նվաճելով եվրոպական ակումբային ֆուտբոլի ամենակարևոր 3 մրցանակները: Շատերն իրենց ձայնը, գուցե, տան Լեո Մեսսին, սակայն, ըստ իս, արգենտինացին աշխարհի 2022 թվականի առաջնությունից հետո գրեթե ոչնչով աչքի չի ընկել, իսկ ԱՄՆ-ի առաջնությունում փայլելը Մեսսիի պես ֆուտբոլիստի համար լուրջ ցուցանիշ չի կարող համարվել», — ասել է Ռոբերտ Գասպարյանը:

Կից ներկայացնում ենք Ռոբերտ Գասպարյանի քվեարկության արդյունքները: