«Մաքուր նրբագեղություն Մխիթարյանից». «Ինտերը» հրապարակել է հայ ֆուտբոլիստի գոլը

Միջազգային հանդիպումներով պայմանավորված դադարի ընթացքում Իտալիայի գործող չեմպիոն Միլանի «Ինտերը» ընկերական մրցավեճ անցկացրեց «Լումեցանեի» հետ և վստահ առավելության հասավ 2:0 հաշվով:

«Ներաձուրիների» կազմում հանդիպման հաշիվը 14-րդ րոպեին բացեց Հայաստանի ազգային հավաքականի նախկին ավագ Հենրիխ Մխիթարյանը: Հանդիպման ավարտից հետո իտալական ակումբի մամուլի ծառայությունը սոցցանցերում տեղադրել է գոլի տեսագրությունը՝ այն մակագրելով.

«Մաքուր նրբագեղություն Մխիթարյանից»:

Սիմոնե Ինձագիի թիմի երկրորդ գնդակը խփեց Ռիչի Ագբոնիֆոն: Վերջինս խաղադաշտ դուրս եկավ 50-րդ րոպեին և ընդամենը 12 րոպե անց՝ 62-րդ րոպեին, ձևակերպեց հանդիպման վերջնական հաշիվը:

Սա «Ինտերի» վերջին ստուգողական մրցավեճն էր դադարի ընթացքում: Միլանյան թիմը պաշտոնական խաղերին կվերադառնա հոկտեմբերի 10-ին, երբ Ա Սերիայի 6-րդ տուրի շրջանակում սեփական հարկի տակ կընդունի «Պարմային»: