Պետք է հանել «վարդագույն ակնոցները» և կրթությամբ զբաղվել. Չիտայի հայ համայնքի ղեկավար

Անդրբայկալյան երկրամասի հայկական սփյուռքի ղեկավար Հարություն Աթոյանը պատմել է, թե ինչպես է 2022 թվականին ստեղծել հայկական սփյուռքի եզակի կրթամշակութային կենտրոնը և այն մասին, թե ինչպես է Լեռնային Ղարաբաղում պատերազմն արմատապես ազդել նրա գործունեության վրա։

«Պատերազմից առաջ զբաղվել ենք ժամանցային գործունեությամբ, ստեղծագործական աշխատանքով, համերգներ, պոեզիայի երեկոներ էինք կազմակերպում։ Իսկ երբ պատերազմ եղավ, ստիպված եղանք կտրուկ փոխվել։ Պարզ դարձավ, որ պետք է հանել «վարդագույն ակնոցները» և կրթությամբ զբաղվել։ Ես հասկացա, որ պետք է ավելի հիմնարար մի բան անել, որը թույլ կտա չկորցնել լեզուն, պատմությունն ու գաղափարախոսությունը: Այդ պատճառով որոշվեց մշակութային կենտրոն բացել», — պատմել է Հարություն Աթոյանը։

Մշակույթի կենտրոնն ունի տարբեր բաժիններ՝ պատմություն, լեզու, պար, բանահյուսություն, սպորտ, շախմատ։ Նախատեսում են նաև դուդուկ դասավանդել: Նա նշել է, որ կենտրոնում սովորում են տարբեր ազգությունների երեխաներ, կան ռուս երեխաներ, որ հայերեն են սովորում։ Իրականում, ըստ նրա, շատ երեխաներ կան խառը ընտանիքներից։

«Ես կարող եմ ասել իմ սիրելի տղայի մասին։ Նա Յարոսլավ Ռևնիվցևն է։ Նրա մայրը հայ է, հայրը ՝ ռուս։ Ես կատակով ասում եմ, որ նա Հայաստանում Ռուսաստանի ապագա դեսպանն է։ Նա շատ է ուզում հայերեն սովորել», — պատմել է հայ համայնքի ղեկավարը։

Խոսելով մշակութային և կրթական կենտրոնի ծրագրերի մասին՝ Աթոյանը նշել է, որ նպատակ ունեն աշակերտների թիվը հասցնել 150-ի, և կարևորը՝ նրանք հանդես գան Անդրբայկալյան երկրամասի հայտնի բեմերում:

«Կարող եմ ասել, որ Ռուսաստանում, բացի մեգապոլիսներից, քիչ հայկական համայնքներ ունեն նման մեծ կենտրոն։ Իհարկե, ապագայում կցանկանայի այս կենտրոնից տեղափոխվել փոքրիկ տարածք, որտեղ կլինի այգի, մատուռ, մշակութային կենտրոնի համար նախատեսված շենք։ Ինձ թվում է, որ մշակույթն ավելի լավ պահպանելու համար պետք է կապ լինի կրոնի և ազգային ինքնության միջև: Հենց եկեղեցին է պահպանել հայոց լեզուն, ստեղծել հայոց այբուբենը և գրականության մեծ մասը։ Կարևոր չէ՝ մարդը հավատացյալ է, թե ոչ, նա պետք է եկեղեցին համարի որպես պատմության մի մաս, որը կրթություն և մշակույթ է տալիս»,- նշել է Հարություն Աթոյանը։