Պուտինի և Թրամփի բանակցությունները բովանդակալից էին և անդրադարձան գլոբալ հիմնական ճգնաժամերին․ Դուդակով
30 Ապրիլի 2026, 21:30
Քաղաքագետ-ամերիկագետ Մալեկ Դուդակովն Alpha News-ի հետ զրույցում մեկնաբանել է ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի բանակցությունները։
«Ռուսաստանի և ԱՄՆ ղեկավարների միջև անցած տարվա դեկտեմբերից հետո տեղի է ունեցել մեկ պաշտոնական հեռախոսազրույց։ Ակնհայտ է, որ կուտակվել էին բազմաթիվ իրադարձություններ, որոնք պետք էր քննարկել նախագահների այս մոտ մեկուկես ժամ տևած զրույցի ընթացքում։ Խոսքը վերաբերում է ինչպես Ուկրաինայում տիրող բարդ ճգնաժամային իրավիճակին, որը դեռևս հեռու է կարգավորումից, այնպես էլ Մերձավոր Արևելքի ճգնաժամին, որը շարունակում է սրվել, ինչպես նաև բազմաթիվ այլ տեղեկատվական և ոչ միայն տեղեկատվական օրակարգային հարցերին։ Շփման ընթացքում հնչել են նաև աջակցող խոսքեր ԱՄՆ նախագահի հասցեին՝ վերջերս տեղի ունեցած մահափորձի համատեքստում։ Ակնհայտ է, որ ԱՄՆ ներսում պառակտումը ներկայում բավական սուր է, և Թրամփը ստիպված է նաև շեղվել արտաքին քաղաքական օրակարգից»,- նշել է Դուդակովը։
Ըստ փորձագետի՝ Ռուսաստանը պաշտպանում է իր ազգային շահերը՝ անկախ Թրամփի դիրքորոշումից։
«Այս զրույցում ռուսական կողմը բավական հստակ շեշտադրումներ է արել։ Նշվել է, որ Ռուսաստանը շարունակում է հետևողականորեն պաշտպանել իր ազգային շահերը բոլոր արտաքին քաղաքական ուղղություններով։ Սա վերաբերում է նաև ուկրաինական իրավիճակին։ Ընդգծվել է, որ հատուկ ռազմական գործողության նպատակները պետք է իրականացվեն ամբողջ ծավալով՝ նախընտրելիորեն դիվանագիտական ճանապարհով, սակայն անհրաժեշտության դեպքում նաև ռազմական։
Նույնը վերաբերում է Մերձավոր Արևելքին․ չնայած ուկրաինական օրակարգի առաջնահերթությանը, Իրանի շուրջ լարվածության պայմաններում Ռուսաստանը հանդես է գալիս ռազմական գործողությունների դադարեցման, հրադադարի և բանակցությունների օգտին՝ ինչպես Հորմուզի նեղուցի հարցում, այնպես էլ Իսլամական Հանրապետության միջուկային ծրագրի ապագայի վերաբերյալ։ Այսպիսով, Ռուսաստանի դիրքորոշումը որոշ առումներով համընկնում է ամերիկյան վարչակազմի մոտեցումների հետ, իսկ որոշներում՝ ոչ, սակայն մնում է ինքնուրույն և սեփական շահերին ուղղված», — նշել է Դուդակովը։
Փորձագետի խոսքով՝ ուկրաինական ուղղությամբ բանակցային գործընթացը շարունակում է փակուղային մնալ։
«Ակնհայտ է, որ ռուսական կողմից կրկին հնչել է մեղմ քննադատություն ամերիկյան վարչակազմի հասցեին․ այս պահին այն ի վիճակի չէ ազդել ո՛չ եվրոպական «պատերազմի կուսակցության», ո՛չ էլ ուկրաինական լոբբիստների վրա՝ նրանց մղելու Ռուսաստանի հետ իրատեսական պայմաններով բանակցությունների։ Միաժամանակ Հաղթանակի օրվա կապակցությամբ կարճաժամկետ հրադադարի առաջարկը, որն աջակցել է Թրամփը, ցույց է տալիս, որ նախաձեռնությունը մնում է Ռուսաստանի ձեռքում։
Սա նաև նշանակում է, որ Մոսկվան չի վախենում ժամանակավոր հրադադարի դեպքում դիրքերի կորստից։ Բացի այդ, հակամարտության ընթացիկ դինամիկան ձևավորվում է Ռուսաստանի օգտին, ինչը կարող է ազդել ամերիկյան վարչակազմի մոտեցման վրա, որը կողմնորոշվում է ուժեղ կողմի հետ փոխգործակցության։ Այս տրամաբանության շրջանակում, եթե Մոսկվայի պայմանները չընդունվեն, դիվանագիտական կարգավորումը կարող է դժվարանալ»,- եզրափակել է Դուդակովը։
Հիմա եթերում
