Ամառն առանց ջրի. Վեոլիայի աշխատանքն ու ջրային ճգնաժամի ուրվականը. «Ուշադրությունից դուրս»
12 Սեպտեմբերի 2025, 21:15
Այս ամառ ծորակը բացելիս երևանցիներից շատերը հոսող ջրի ձայնի փոխարեն լսեցին խողովակից դուրս եկող օդի ձայնը։ «Վեոլիա Ջուր»-ը, կամ ինչ-որ երրորդ կողմ, մեր փոխարեն որոշել էր՝ այդ օրը չենք լողանալու։ «Վեոլիա Ջուր» ընկերության հայտարարությունների դիտարկումով կարելի է արձանագրել, որ այս ամառ ջրամատակարարող կազմակերպությունն ամեն օր ներողամտություն էր հայցում որևէ վարչական շրջանում ապրողներից։
Ըստ փորձագիտական գնահատականների՝ պատճառներից մեկը Հայաստանում, մասնավորապես՝ Երևան քաղաքում, լայնածավալ շինարարությունն է։ Կառուցապատողն է որոշում՝ որտեղ ինչ կառուցի, քանի հարկանի շենք և ինչ մասշտաբի։ Արդյունքում, ջրամատակարարման բեռն ավելանում է, և համակարգը կոլապսի առաջ է կանգնում։ Օբյեկտիվ հանգամանքներից բացի, փորձագետների գնահատմամբ, ջրամատակարարման խնդիրները պայմանավորված են նաև հենց «Վեոլիա Ջուր» ընկերության պայմանագրային պարտավորությունները չկատարելու պատճառով։
Թե որ ոլորտում որքան գումար է ծախսվել, հաճախ տվյալներին չի տիրապետում նույնիսկ Ջրային պետական կոմիտեն, քանի որ «Վեոլիա Ջուր»-ը մանրամասն հաշվետվություն չի ներկայացրել այդ կառույցին։ Խմելու ջրի ճնշման պակասից մինչև ջրի պակասորդ, անձրևատարներ, կոյուղագծեր և այլն․ ընկերության աշխատանքի հետ կապված դժգոհությունները միայն ջրամատակարարման ոլորտին չեն առնչվում։
«ԱլֆաՆյուզի» հետ զրույցում մեր բանախոսները շեշտում են, որ Հայաստանում կառավարությունն «ատամներով պահում է» ֆրանսիական «Վեոլիա Ջուր» ընկերությանը, մինչդեռ եթե նույն Ֆրանսիայում այսքան ջրանջատումներ լինեին, քաղաքացիներն ու կառավարությունը կազմակերպության դեմ այնքան դատական հայց կներկայացնեին, որ այն կսնանկանար։
Հիմա եթերում
