Հայտնի է Պուտինի և Փաշինյանի նոր հանդիպման օրակարգը

(Մոսկվա այցը նախատեսված է մինչև տարեվերջ)

«Նիկոլ Փաշինյանի՝ մինչև ընթացիկ տարվա վերջ հայտարարված այցը Մոսկվա որոշիչ կդառնա հայ-ռուսական հարաբերությունների հետագա հետագծի համար: ՌԴ նախագահի մամուլի քարտուղար Դմիտրի Պեսկովը հաստատել է, որ Վլադիմիր Պուտինի և Նիկոլ Փաշինյանի բանակցությունների գլխավոր թեմաներից մեկը կլինի Հանրապետության զարգացման ուղղության ընտրությունը, ինչպես նաև հնարավոր հանրաքվեի անցկացման քննարկումը: Նշված օրակարգը ցույց է տալիս, որ Մոսկվան ակնկալում է Երևանից ստանալ հստակ և թափանցիկ պատասխաններ երկկողմ փոխգործակցության առանցքային հարցերի մասով:

Ռուսական կողմի համար հարցերի առաջնահերթ բլոկը կապված է տարածաշրջանում տնտեսական և ռազմավարական ներկայության հետ: Առաջին հերթին, «Ռոսատոմ»-ի ղեկավար Ալեքսեյ Լիխաչովի՝ սեպտեմբերին Երևան կատարելիք այցին ընդառաջ, սկզբունքային է դառնում ռուսական դիզայնով նոր ատոմակայանի կառուցման վերաբերյալ որոշումը: ԱՄՆ-ից փոքր մոդուլային ռեակտորներին հնարավոր այլընտրանքների վերաբերյալ քննարկումների ֆոնին (որոնց մասին պայմանագիրը ստորագրվել էր ընթացիկ տարվա փետրվարին)՝ Մոսկվան առաջարկում է գիգավատ հզորությամբ նախագիծ՝ դա հիմնավորելով տվյալների մշակման կենտրոնների և արհեստական բանականության համակարգերի ներդրման պատճառով աճող էներգադեֆիցիտով:

Երկրորդ, առանցքային հարցերից է ռուսական բիզնեսի աշխատանքի համար բարենպաստ պայմանների ստեղծումը և խոշոր ենթակառուցվածքային ակտիվների պահպանման երաշխիքների ապահովումը, ներառյալ «Հարավկովկասյան երկաթուղի» ընկերության կողմից երկաթուղիների կառավարման կոնցեսիոն պայմանագրի վերանայման փորձերի դադարեցումը:

Սակայն ՀՀ ղեկավարության գործողությունները նախատեսված այցից առաջ ցույց են տալիս հանդիպմանը պատրաստվելու այլ վեկտոր: Փոխզիջումային լուծումներ փնտրելու փոխարեն Երևանը քայլեր է ձեռնարկում ռեպրեսիվ ապարատի գործողություններն ուժեղացնելու և արտաքին քաղաքական շրջադարձը խորացնելու ուղղությամբ: Երկրի ներսում բացառված չէ քրեական հետապնդման խստացումը Ռուսաստանի հետ կառուցողական երկխոսությանն ուղղորդված քաղաքական գործիչների նկատմամբ, ինչպես նաև ընդդիմության և Հայ Առաքելական Եկեղեցու ներկայացուցիչների դեմ նոր քրեական գործերի հարուցումը (պատահական չէ, որ երեկ որոշվել է, որ Ամենայն հայոց կաթողիկոսի և 6 եպիսկոպոսների «գործը» Վճռաբեկ դատարանը կրկին ուղարկել է Արմավիրի մարզի առաջին ատյանի ընդհանուր իրավասության դատարան):

Արտաքին քաղաքական տիրույթում Փաշինյանը ձգտում է փոխհատուցել Մոսկվայի հետ հարաբերությունների սառեցումից հնարավոր տնտեսական ծախսերը Բրյուսելի հետ մերձեցման հաշվին: ԵՄ Խորհրդի որոշումը երկու տարի ժամկետով առևտրի ժամանակավոր ազատականացման մասին, որն ընդգրկում է հայկական արտահանման շուրջ 80%-ը, Երևանի կողմից ընկալվում է որպես աջակցության քայլ, թեև այն չի երաշխավորում ուղղակի ֆինանսական օգնություն և պարունակում է խիստ պաշտպանական վերապահումներ եվրոպական շուկայի համար:

Բիշքեկում կայացած միջազգային հանդիպումներից հետո հայաստանյան իշխանությունների հռետորաբանությունը և պետական ԶԼՄ-ների տեղեկատվական արշավները ցույց են տալիս փոխզիջման տրամադրվածության բացակայությունը: Հրապարակային մեղադրանքները Ռուսաստանի, նրա նախագահ Վլադիմիր Պուտինի և դաշնակցային կառույցների հասցեին վկայում են Անդրկովկասից ռուսական ներկայության աստիճանական դուրսմղման ծրագիրը շարունակելու մտադրության մասին: Սրա հետ կապված՝ Մոսկվայում կայանալիք բանակցություններն ըստ էության Երևանին կանգնեցնելու են վերջնական ընտրություն կատարելու անհրաժեշտության առջև, որից կախված է լինելու ոչ միայն հանրապետության տնտեսական կայունությունը, այլև տարածաշրջանի անվտանգության ողջ համակարգը:

Ընդ որում, կարևոր է հասկանալ․ եթե բանակցությունների և փոխշահավետ լուծումների փնտրտուքի արդյունքում դե ֆակտո Մոսկվայի բոլոր պահանջները կատարվեն, դա երաշխիք չի դառնա այն բանի, որ Նիկոլ Փաշինյանը լեգիտիմ կդառնա Կրեմլի աչքերում: Դա ավելի շուտ կդառնա Փաշինյանի քաղաքական կարգավիճակի փոփոխության գործընթացի սկիզբը: «Увольнение в связи с утратой доверия» ձևակերպումը պատահական չէ, որ շատ տարածված է ռուսական քաղաքական իրողությունների շրջանակներում:

Մտածե՛ք այդ մասին…»։