Վիգեն Հակոբյան | 2024. ի՞նչ է լինելու | ԱՐՑԱԽ․ ՀԱՅԱՍՏԱՆ․ ՆՈՐ ՇԽԱՐՀԱԿԱՐԳ
13 Փետրվարի 2024, 22:00
«Նոր աշխարհակարգը հիմնված է լինելու ուժային բալանսի վրա, եւ եթե Ռուսաստանն աշխարհի կողմից ընկալվի որպես հաղթող, ապա նա կվերադառնա Խորհրդային Միություն գերտերության կարգավիճակին»:
Ի՞նչ զարգացումներ կլինեն 2024-ին Արցախի շուրջ, հնարավո՞ր է արդյոք հայերի վերադարձն իրենց ծննդավայր, ո՞ր ուղղությամբ է գնում Հայաստանը, կկնքվի՞ արդյոք խաղաղության պայմանագիր Ադրբեջանի հետ, ի՞նչ փոփոխություններ կլինեն աշխարհում եւ ինչպիսի՞ն է լինելու նոր աշխարհակարգը:
Այս եւ այլ հարցերի մասին Alpha News-ը «2024. ի՞նչ է լինելու» հաղորդաշարի շրջանակում զրուցել է քաղտեխնոլոգ Վիգեն Հակոբյանի հետ:
Առանց անվտանգության երաշխիքների՝ արցախցիների՝ իրենց ծննդավայր վերադառնալու հնարավորություն ըստ Հակոբյանի՝ չկա:
«Այս պայմաններում արցախցիները չեն ցանկանա վերադառնալ, նույնիսկ ռուս խաղաղապահների ներկայությամբ: Մենք տեսանք, թե ինչ տեղի ունեցավ ռուս խաղաղապահների ներկայությամբ ռեալ անկախության պայմաններում: Խաղաղապահների լիազորությունները պետք է փոխվեն, կոնկրետ խնդիրներ դրվեն, եւ թե ինչ իրավունքներ ունեն այս կամ այն լարման պայմաններում»,- ասաց քաղտեխնոլոգը:
Տրիգերներ կան, բայց քաղաքական կամք է բացակայում, որպեսզի Հայաստանում իշխանափոխություն լինի, կարծում է Հակոբյանը:
«Ընդդիմության գլխավոր սխալն այն է, որ շատ դեպքերում նրանց աչքը դուրսն է: Մինչդեռ դրսի աչքը ներսի վրա է, դրսում միշտ հաշվի են նստում ներսի իրողությունների հետ: Նիկոլ Փաշինյանի կեղծ խաղաղությանը, որը տանում է պատերազմի, պետք է փոխարինի իրական խաղաղության կոնցեպտը, որը հիմնված կլինի անվտանգության, զարգացման, դաշնակիցներ ձեռք բերելու եւ այլնի վրա: Եվ հենց այդ ուժերն էլ բարոյական ու քաղաքական իրավունք կունենան մարդկանց փողոց կանչել եւ մարդիկ, որոնք այսօր իբր, թե ապատիայի մեջ են կամ քաղաքականությամբ չեն զբաղվում, կսկսեն հավատալ առաջարկված այլընտրանքին»,- ասաց Հակոբյանը:
Խոսելով նոր աշխարհակարգից, Հակոբյանը փաստեց՝ սառեցված կոնֆլիկտները թեժանում են, իսկ այնտեղ, որտեղ կոնֆլիկտ չկա, բայց կա մեծ պրոբլեմ, կոնֆլիկտի է վերածվում:
«Մինչեւ նոր աշխարհակարգի վերջնական ձեւավորմանը հասնելը՝ փորձելու են ի մի բերել լոկալ խնդիրները: Ընդ որում, հաշվի առնելով աշխարհաքաղաքական խաղացողների շահերը: Նոր աշխարհակարգը հիմնված է լինելու ուժային բալանսի վրա, եւ եթե Ռուսաստանն աշխարհի կողմից ընկալվի որպես հաղթող, ապա նա կվերադառնա Խորհրդային Միություն գերտերության կարգավիճակին եւ այդտեղ շատ բան կախված է լինելու, թե ով եւ ինչ կարող է դնել խաղասեղանին»,- հավելեց Հակոբյանը:
Մանրամասները՝ տեսանյութում:
Հիմա եթերում
