Ռուսաստանը չի մոռանա Հայաստանի մասին՝ չնայած հարաբերությունների սառեցմանը. Պավել Դուբրավսկի

Քաղտեխնոլոգ, «Դուբրավսկի Քոնսալթինգ»-ի ղեկավար Պավել Դուբրավսկին Alpha News-ի հետ զրույցում մեկնաբանել է Ռուսաստանի Դաշնության արտաքին գործերի նախարար Սերգեյ Լավրովի աշխատանքային այցը Երևան և դրա կապակցությամբ արևմտամետ ուժերի կողմից ծրագրվող բողոքի ակցիաները:

Փորձագետի կարծիքով՝ Հայաստանում հակառուսական տրամադրությունները լայն տարածում չունեն, այլ հասարակության միայն որոշակի հատվածի մոտ են։

«Չնայած նրան, որ մենք այսօր Երևանում տեսնում ենք հակառուսական պաստառ, ես, այնուամենայնիվ, կասեի, որ դա հայ հասարակության միայն մի մասն է, որն արտահայտում է իր բողոքը, բայց դա չի արտահայտում ողջ հայ ժողովրդի կոնսենսուսային կարծիքը։ Հայաստանի հասարակության որոշակի հատվածին, Ղարաբաղի շուրջ ՀԱՊԿ-ի հետ կոնֆլիկտից հետո, վրդովեցրել է այն, որ իրենց տեսանկյունից Ռուսաստանը նրանց աջակցություն չի ցուցաբերել։ Այնպես որ, ես չէի ասի, որ դրանք ինչ-որ զանգվածային տրամադրություններ են: Ինձ թվում է, որ կա մարդկանց առանձին խումբ, որոնց վիրավորել է այս ամբողջ հակամարտությունը, և նրանք կարծում են, որ Հայաստանն ու Ռուսաստանը պետք է գնան տարբեր ճանապարհներով։ Այսինքն՝ Երևանին պետք է եվրոպականացնել, գնալ ԵՄ-ի, այդ թվում՝ Ամերիկայի Միացյալ Նահանգների հետ հարաբերությունների բարելավման ուղղությամբ և չհամագործակցել Ռուսաստանի Դաշնության հետ։ Բայց ես չէի ասի, որ այդ տրամադրությունները զանգվածային են», — ասել է Դուբրավսկին։

Փորձագետի խոսքով՝ Լավրովի այցը ոչ միայն առիթ է «հիվանդանոցում ջերմաստիճանը չափելու», այլև նայելու պաշտոնյաների և հայ հասարակության արձագանքին:

«Ես կարծում եմ, որ ամեն դեպքում Հայաստանը գտնվում է Ռուսաստանի Դաշնության շահերի տիրույթում։ Եվ չնայած այն հանգամանքին, որ այժմ երկու երկրների հարաբերությունները մի փոքր սառել են, դա չի նշանակում, որ Ռուսաստանի Դաշնությունը կմոռանա Հայաստանի և հայ ազգի մասին, այլ, ամենայն հավանականությամբ, առիթներ կփնտրի և, ավելին, կսպասի հնարավորության, որպեսզի մոտավորապես նման սխեմա կառուցի, ինչպես Վրաստանում էր։ Վրաստանը տարիներ շարունակ պաշտոնական անձանց մակարդակով բավական քննադատաբար էր վերաբերվում ռուսական իշխանությանը, սակայն վերջին ընտրությունները ցույց տվեցին, որ ամեն ինչ փոխվում է: Ես կարծում եմ՝ Հայաստանում նման սցենարը զուտ տեսականորեն նույնպես հնարավոր է», — ընդգծել է Դուբրավսկին։