Սահմանազատման աշխատանքները կսկսվեն Տավուշից

Հայաստանի և Ադրբեջանի միջև սահմանազատման հաջորդ փուլը կմեկնարկի հյուսիսից։ Բաքուն և Երևանը համաձայնեցրել են աշխատանքների իրականացման ուղղությունը․ գործընթացը կընթանա հյուսիսից հարավ:

Աշխատանքները նախատեսվում է սկսել Հայաստանի, Ադրբեջանի և Վրաստանի սահմանների հատման կետից։ Հայաստանի կողմից գործընթացում ընդգրկված հատվածը ներառում է Տավուշի մարզը՝ Բերդավան և Նոյեմբերյան բնակավայրերի շրջակայքը, իսկ Ադրբեջանի կողմից՝ Ղազախի շրջանը։

Այդ կետից քարտեզագրման խմբերը հաջորդաբար կշարժվեն դեպի հարավ՝ իրականացնելով սահմանազատման աշխատանքները։

Գործընթացի համակարգումն իրականացնում են սահմանազատման հարցերով Հայաստանի և Ադրբեջանի համատեղ հանձնաժողովները, որոնք ղեկավարում են ՀՀ փոխվարչապետ Մհեր Գրիգորյանը և Ադրբեջանի փոխվարչապետ Շահին Մուստաֆաևը։