«Սպարտակ» մարզադաշտի մոտ Նիկիտա Սիմոնյանի բրոնզե արձանը կտեղադրվի

Մոսկվայի «Սպարտակ» ակումբի մարզադաշտում հուշարձան կտեղադրի խորհրդային և հայկական ֆուտբոլի լեգենդ, անվանի ֆուտբոլիստ և մարզիչ, ԽՍՀՄ սպորտի վաստակավոր վարպետ, ՌՍՖՍՀ-ի և ԽՍՀՄ-ի վաստակավոր մարզիչ, 1956 թվականի օլիմպիական չեմպիոն և «կարմրասպիտակների» լավագույն ռմբարկու Նիկիտա Սիմոնյանի պատվին։

Այս մասին հայտնել է Ռուսաստանի ֆուտբոլի միության առաջին փոխնախագահ, ՌԴ ֆուտբոլի վետերանների միության նախագահ և «Սպարտակ»-ի վետերանների կոմիտեի անդամ Ալեքսանդր Միրզոյանը։ Հոկտեմբերի 12-ին Սիմոնյանը կդառնար 100 տարեկան։

«Հարյուրամյակի առթիվ «Սպարտակ» մարզադաշտում հուշարձան կտեղադրվի Ա տրիբունայի մոտ, որն այժմ կրում է Նիկիտա Պավլովիչի անունը։ Կլինի մեծ քանդակ, իսկ բացումը, հավանաբար, տեղի կունենա հոկտեմբերի 18-ին։ Դա անում է «Սպարտակ»-ը, մենք նույնպես մասնակցում ենք։ Նախատեսում ենք նաև Նիկիտա Պավլովիչի անվան մրցանակ, որը կունենա 9 անվանակարգ, քանի որ նա խաղում էր 9 համարի ներքո։ Հրավիրված են նաև արտասահմանցի ֆուտբոլիստներ, սակայն դա նախատեսված է հոկտեմբերի 12-ին՝ Նիկիտա Պավլովիչի ծննդյան 100-ամյակի օրը»,– ասել է Միրզոյանը։

Հուշարձանի հեղինակը քանդակագործ Նատալյա Օպիոկն է։ Նիկիտա Սիմոնյանի բրոնզե արձանի բարձրությունը 3 մետր է։ Որպես հիմք օգտագործվել է 1950-ականների երկրորդ կեսին արված լուսանկար, որտեղ «Սպարտակ»-ի ֆուտբոլիստը պատկերված է հարձակման ժամանակ։

Քանդակը հավանության են արժանացրել Սիմոնյանի դուստրը՝ Վիկտորիա Նիկիտան, թոռը՝ Գրիգորին, ինչպես նաև ֆուտբոլի վետերանները։