Վստահ ենք առաջիկա խաղերի հարցում. Հենրիխ Մխիթարյան

Սերիա Ա-ի 2024/25թթ․ խաղարկության 11-րդ տուրում «Ինտեր»-ը սեփական հարկի տակ ընդունել է «Վենեցիա»-ին: «Ինտեր»-ը մրցակցին հաղթել է նվազագույն հաշվով։ Հայաստանի հավաքականի նախկին ավագ Հենրիխ Մխիթարյանը խաղից հետո կիսվել է տպավորություններով:

«Հնարավորությունները չօգտագործելով` ինքներս մեզ բարդ իրավիճակի մեջ գցեցինք։ Կարող էինք ժամանակից շուտ լուծել խաղի ելքը։ Այս հարցում պետք է շտկումներ անենք։ Հասկանում էինք, որ կարող ենք ավելի մեծ հաշվի տարբերությամբ հաղթել և շատ ենք աշխատում՝ լավ արդյունք ցույց տալու համար։ Վստահ ենք առաջիկա խաղերի հարցում, ցանկանում ենք, որ մեր երկրպագուները հպարտանան մեզնով։

«Ինտեր»-ի կազմում հանդես գալն ինձ իրոք յուրահատուկ զգացողություն է պարգևում, այստեղ ես ինձ շատ երջանիկ եմ զգում։ Թիմակիցներս ինձ շատ են օգնում, և ես այստեղ եմ՝ թիմին օգտակար լինելու համար։

Հիմա պետք է մտածենք «Արսենալ»-ի խաղի մասին, որից հետո շատ հետաքրքիր և յուրահատուկ հանդիպում ենք ունենալու արդեն «Նապոլի»-ի հետ»,- նշել է հայ կիսապաշտպանը: