Հայաստանի կողմից «Ղարաբաղը Ադրբեջանի անբաժան մաս» ճանաչելու ֆոնին, Մակրոնի հայտարարությունը խոչընդոտում է խաղաղությանը. Ադրբեջանի ԱԳՆ

29 Հունիսի 2023, 17:50

Քաղաքականություն

Ադրբեջանի ԱԳՆ-ն արձագանքել է Մարսելի հայ համայնքի ներկայացուցիչների հետ հանդիպմանը Ֆրանսիայի նախագահ Մակրոնի արած հայտարարությանը եւ այն անընդունելի որակել:

Ադրբեջանի արտաքին գերատեսչությունը շեշտել է, որ «Հայաստանի կողմից Ադրբեջանի տարածքային ամբողջականության ճանաչման և Ղարաբաղը որպես «Ադրբեջանի անբաժան մաս» (չակերտները՝ Alpha News-ի) ճանաչելու ֆոնին նախագահ Մակրոնի նման «կողմնակալ» (չակերտները՝ Alpha News-ի) հայտարարությունները ոչ միայն խոչընդոտում են տարածաշրջանում խաղաղության և հանգստության հաստատմանը, այլև նպաստում անջատողականությունը և ահաբեկչությունը խրախուսողների և աջակցողների ապակառուցողական գործունեության հետագա ընդլայնմանը»:

Ադրբեջանի ԱԳՆ-ն շարունակել է. «Ադրբեջանի նախագահ Իլհամ Ալիևի վրա ճնշում գործադրելու հայտարարությունները Ֆրանսիայի նախագահ Մակրոնի «երևակայության արգասիքն են» (չակերտները՝ Alpha News-ի)։ Ադրբեջանի նախագահի վրա ճնշում գործադրելու փորձերը երբեք արդյունք չեն տվել: Նախագահ Մակրոնի հայտարարությունը ևս մեկ անգամ ցույց է տալիս, որ նա «գործիք է» (չակերտները՝ Alpha News-ի) Ֆրանսիայի հայկական լոբբիի ձեռքում…»:

Ավելի վաղ տեղեկացրել էինք, որ արձագանքելով Մարսելի հայ համայնքի ներկայացուցիչների կոչին՝ գործնական աջակցություն ցուցաբերել Արցախին, Մակրոնը հայտարարել էր. «Ալիևի վրա ես ավելի շատ ճնշում եմ գործադրել և ավելի շատ ճնշում եմ գործադրելու, քան ինքը՝ Փաշինյանը։ Հարցը Փաշինյանն է, Արցախի հարցում ես միակն եմ, որ հստակ դիրքորոշում և ուղերձ ունեմ»։

Ֆրանսիայի նախագահը հորդորել էր չկասկածել իր վճռականության վրա՝ նշելով, որ Արցախի և, ընդհանրապես, Հայաստանի հետ կապված ջանքերը շարունակելու է, նույնիսկ, եթե միջազգային ընտանիքում գրեթե միակը լինի այդ օրակարգով։

Հիմա եթերում