Հռոմից 29 տարով մեծ. Երևանը 2806 տարեկան է

Հայաստանի մայրաքաղաք Երևանն այսօր նշում է հիմնադրման 2806-ամյակը: Այն աշխարհի ամենահին քաղաքներից մեկն է. 29 տարով մեծ է Հռոմից։ ՀՀ կառավարության 2005 թվականի հունիսի 23-ի որոշմամբ Երևանի օրը նշվում է հոկտեմբերի երկրորդ հանգստյան օրերին: Այդ օրը քաղաքի տարբեր վայրերում մայրաքաղաքի բնակիչների համար անցկացվում են մի շարք տոնական միջոցառումներ:

Տոնն առաջին անգամ նշվել է 1968 թվականին, իսկ մայրաքաղաքի օրհներգը Պարույր Սևակի «Էրեբունի-Երևան» բանաստեղծության հիման վրա գրված երգն էր, որի երաժշտությունը հեղինակել է կոմպոզիտոր Էդգար Հովհաննիսյանը: Մինչև 1988 թվականը Երևանի օրը նշվում էր ամեն տարի, սակայն երկրի անկախության հռչակումից հետո այդ ավանդույթը վերսկսվեց միայն 1998 թվականին։

Երևանի հիմնադրման տարեթիվը համարվում է մ.թ. ա. 782 թվականը, երբ Ուրարտուի թագավոր Արգիշտի Ա-ն այստեղ հիմնեց Էրեբունի ամրոց-քաղաքը:

Այսօրվա դրությամբ Երևանը պետության խոշորագույն արդյունաբերական և տնտեսական կենտրոնն է։ Սա հակադրությունների քաղաք է, որտեղ միահյուսված են դասական և ժամանակակից ճարտարապետական ոճերը։ Երևանը հարուստ է իր տեսարժան վայրերով, ճարտարապետական հոյակապ կառույցներով, հուշարձաններով, մշակութային բազմազան կենտրոններով՝ թանգարաններով, թատրոններով, կինոթատրոններով, պատկերասրահներով, համերգասրահներով, ջազ ակումբներով և հանգստի այլ վայրերով:

Խորհրդային շրջանի շենքերի հիմնական մասը կառուցված է վարդագույն տուֆից։ Այդ պատճառով Երևանը անվանում են «Վարդագույն» քաղաք։ Դժվար է գտնել աշխարհում երկրորդ նույն քաղաքը, որն ունի նույնքան մշակութային և պատմական հուշարձաններ և տեսարժան վայրեր: Մայրաքաղաքի հիմնական մասը գտնվում է Արարատյան դաշտի տարածքում, ուստի ամեն տեղից բացվում է հիանալի տեսարան դեպի բիբլիական Արարատ լեռը։

Քաղաքի գլխավոր փողոցում՝ Մաշտոցի պողոտայում, գտնվում է հին ձեռագրերի ինստիտուտ Մատենադարանը, որտեղ հավաքված են հին հունական և հայկական հազարավոր ձեռագրեր: Հանրապետության հրապարակը Երևանի գլխավոր հրապարակն է, մայրաքաղաքի սիրտը՝ երգող շատրվաններով և Կառավարության շենքը՝ սյունասրահով: Ազգային պատմության թանգարանը, որը հիմնադրվել է անցյալ դարի 20-ական թվականներին, ներկայացնում է հնագիտական գտածոներ, ինչպիսիք են կաշվե կոշիկները՝ մ. թ. ա. մոտ 3500 թ.։