Թուրքիայում «Նեմեսիս»-ի արձանի վերաբերյալ մեր պատվիրակությանը որևէ պահանջ չի ներկայացվել. Թունյան
Իշխող «Քաղաքացիական պայմանագիր» խմբակցությունը չի քննարկել «Նեմեսիս» գործողության հերոսների հիշատակը հավերժացնող հուշակոթողի ապամոնտաժման հարցը: Այս մասին այսօր՝ մայիսի 10-ին, խորհրդարանում լրագրողների հետ զրույցում ասել է խմբակցության պատգամավոր Բաբկեն Թունյանը:
Նրա համոզմամբ՝ հուշակոթողի տեղադրումը հայ-թուրքական հարաբերություններում դժվարություններ է առաջացրել, ինչը, սակայն, հնարավոր է լուծել բանակցությունների միջոցով:
«Թե ինչ հանգուցալուծում կունենա, ես չեմ կարող ասել, որովհետեւ այդ թեմայի շուրջ ես բավարար ինֆորմացիա չունեմ»,- ասել է Բաբկեն Թունյանը:
Հարցին, թե Թուրքիայում Հայաստանի ԱԺ նախագահի գլխավորած պատվիրակությանը ուղիղ ասվե՞լ է, որ պետք է արձանը հեռացվի, հակառակ դեպքում լուրջ հետեւանքներ կլինեն, Բաբկեն Թունյանն ասել է.
«Հայկական պատվիրակությանը նման բան չի ասվել, որովհետեւ հայկական պատվիրակության լիազորությունները, քննարկվող հարցերի շրջանակը հարց տվողները շատ լավ գիտեն: Ես ասացի, որ տվյալ հարցը քննարկվել է Հայաստանի ու Թուրքիայի խորհրդարանների խոսնակների միջեւ եւ դրանից ավել խոսակցություն կամ ուղիղ տեքստով որեւէ պահանջ մեր պատվիրակությանը չի ներկայացվել»:
Հիմա եթերում
