«Ռոստեխ»-ը Հայաստանին ռադիոփարոս է մատակարարել՝ լեռնային տեղանքում ինքնաթիռների կողմնորոշման համար

«Ռոստեխ» պետական կորպորացիայի «Ազիմուտ» արտադրական ընկերությունը Հայաստանին մատակարարել է VOR/DME 2700 ռադիոփարոս, որը կօգնի ինքնաթիռներին կողմնորոշվել լեռնային տեղանքում: Այն որոշում է օդանավի գտնվելու վայրը և կարող է միաժամանակ վարել մինչև 200 ինքնաթիռ:

Սարքավորումները տեղադրված են Սիսիանում: Այս մասին հայտնում է պետական կորպորացիայի կայքը։ Սարքավորումը երաշխավորված է ICAO-ի (Քաղաքացիական ավիացիայի միջազգային կազմակերպություն) կողմից որպես օդային ուղիներում նավիգացիայի հիմնական միջոց, ինչպես նաև որպես լրացուցիչ միջոց՝ ինքնաթիռների վայրէջքի մոտեցման ժամանակ։

««Ազիմուտ» ռադիոփարոսն ապացուցել է, որ հուսալի և ամուր սարքավորում է։ Ներկայումս այն հաջողությամբ շահագործվում է Ստավրոպոլում, Չելյաբինսկում, Կալինինգրադում, Խաբարովսկում, Նովոսիբիրսկում և Ռուսաստանի այլ քաղաքներում, ինչպես նաև արտասահմանյան օդանավակայաններում: Այժմ մենք ավարտել ենք VOR/DME 2700-ի փորձարկումները Հայաստանում, ինչը թույլ կտա օդանավերին կողմնորոշվել օդային ուղիներում լեռնային տեղանքի և վատ եղանակի պայմաններում», — նշել է «Ռոստեխ»-ի մեջ մտնող «Ազիմուտ» ընկերության գլխավոր տնօրենի տեղակալ Ալեքսեյ Գալչենկովը։