Արցախի մայր բուհում ամփոփվել են հոգեբանների համար մեկնարկած վերապատրաստման դասընթացի արդյունքները

Ամփոփվել են Արցախի մայր բուհում մեկնարկած Ստեփանակերտ քաղաքի ուսումնական հաստատությունների հոգեբանների, սոցիալական մանկավարժների, սոցիալական աշխատողների, հատուկ մանկավարժների, լոգոպեդների մասնագիտական վերապատրաստման և ատեստավորման դասընթացի արդյունքները, մասնակիցներն ստացել են հավաստագրեր։

«Արցախպրես»-ի փոխանցմամբ՝ դասընթացը օգնել է մասնագետներին ավելի խորացնել իրենց տեսական գիտելիքները և անհատական ու խմբային աշխատանքների իրականացման պրակտիկ հմտությունները:

«Դասընթացի նպատակն էր, որպեսզի մասնակիցները իմանան հոգեկան երևույթների առաջացման ու դրսևորման հոգեֆիզիոլոգիական օրինաչափությունները, հոգեկան առողջության պահպանման առանձնահատկությունները, ճանաչեն հոգեբանական հիմնախնդիրների հոգեկան վնասվածքների պատճառահետևանքային կապն ու դրանց ձևավորման հոգեֆիզիոլոգիական մեխանիզմները»,- նշել է ԱրՊՀ  պրոռեկտոր, հ.գ.թ. Վիտյա Յարամիշյանը:

Նրա խոսքով՝ անցկացված վերապատրաստման դասընթացը վեր կհանի խնդիրները ու կնախանշվեն դրանց լուծման ուղիները։