Հայաստանի մասին ֆոտոցուցահանդես՝ Ֆրանսիայում

Մինչև օգոստոսի վերջ Էմոնսթուար քաղաքում (Կոտ դ’Արմոր դեպարտամենտ) բացվել է «Հայաստան. պատերազմի և խաղաղության միջև» խորագրով ցուցահանդեսը՝ նվիրված հայոց պատմությանն ու մշակույթին: Ցուցահանդեսը ներառում է լուսանկարներ, որոնք արվել են Լիդիա Կասպարյանի կողմից 2000 թվականին Հայաստանում կատարած ճանապարհորդության ժամանակ: Աշխատանքները տեղադրված են քաղաքի տարբեր թաղամասերում և հասանելի են անվճար դիտման համար:

Լիդիա Կասպարյանը ֆրանսահայ լուսանկարիչ է։ Նրա ստեղծագործական ոճը ձևավորվել է հոր՝ Ռոժե Կասպարյանի ազդեցության տակ, ով արժանացել է «60-ականների լավագույն հայացք» կոչման հայտնի արտիստների, այդ թվում՝ Շառլ Ազնավուրի, The Beatles-ի, The Rolling Stones-ի և Սերժ Գենսբուրի բացառիկ լուսանկարների համար:

Կասպարյան ընտանիքի պատմությունը ևս սերտորեն կապված է ողբերգական իրադարձությունների հետ. Լիդիայի պապը՝ Վարազդատ Կասպարյանը վերապրել է 1915 թվականի Հայոց ցեղասպանությունը և հարյուր որբերի հետ ժամանել է Ֆրանսիա: