«Եթե Փաշինյանը վերընտրվի, հայ-ռուսական հարաբերությունները գահավիժելու են». «2026. ի՞նչ է լինելու»
14 Հունվարի 2026, 20:00
Քաղաքագետ Բենիամին Մաթևոսյանը պնդում է՝ եթե Նիկոլ Փաշինյանը վերընտրվի հունիսին նախատեսված խորհրդարանական ընտրություններում, ապա հայ-ռուսական հարաբերությունները շարունակելու են գահավիժել: Երևան-Մոսկվա հարաբերությունների զարգացումն ըստ նրա՝ կախված է, թե ով ընդդիմությունից իշխանության կգա:
«Բայց ես գաղտնիք բացահայտած չեմ լինի, եթե ասեմ, որ Հայաստանում այնքան էլ շատ չեն քաղաքական գործիչներն ու ուժերը, որոնք Ռուսաստանի համար վստահություն ունեցող գործընկերներ են: Իսկ Փաշինյանի վերարտադրությունը ենթադրում է ՀԱՊԿ-ից, ԵԱՏՄ-ից դուրս գալ, 102-րդ ռազմաբազայի ու ռուս սահմանապահների դուրսբերում և տնտեսական առումով ինտեգրում թուրքական աշխարհին: Նիկոլ Փաշինյանը մինչև հիմա դուրս չի եկել ՀԱՊԿ-ից ու ԵԱՏՄ-ից, որպեսզի այնքան ժամանակ ձգի, որ Թուրքիայի ու Ադրբեջանի հետ ունենա ինչ-որ հարաբերությունների մակարդակ, որը կկարողանա վաճառել հասարակության վրա»,- Alpha News-ի՝ «2026. ի՞նչ է լինելու» նախագծի շրջանակում ասել է Բենիամին Մաթևոսյանը:
Ռուսաստանին այլընտրանքը Թուրքիան ու Ադրբեջանն են, բայց դա էլ ըստ քաղաքագետի՝ նշանակում է ամբողջովին կախվածության մեջ մտնել այդ երկրներից:
«Այս մարդիկ, ովքեր 2018-ին ասում էին, թե ինքնիշխանության մակարդակի բարձրացում է տեղի ունեցել, մեզ ինտեգրելու են թուրքական աշխարհին, Փաշինյանն էլ դառնալու է Արցախի 4-րդ նախագահ Արայիկ Հարությունյանը, որը 2020-ին և 2023-ին տարբեր էր: 2020-ի պատերազմի սկզբին Հայաստան-Արցախ անվտանգային համակարգ կար, դրա համար էլ Արայիկ Հարությունյանը հայտարարեց՝ պատերազմ եք ուզում, պատերազմ կստանաք, այսինքն՝ հնարավորություն կար ռազմական առումով պատասխանել Ադրբեջանին: Խաղաղությունն այդպես է լինում, երբ ուժի կիրառմամբ կարողանում ես հակառակորդին պարտադրել դա, բայց տեղի ունեցավ այն, ինչ տեղի ունեցավ: Իսկ 2023-ին Արայիկ Հարությունյանը գտնվում էր ոչ թե խաղաղության, այլ չպատերազմի իրավիճակում, ի՞նչ նա կարող էր անել Ադրբեջանի ճնշումների դեմ, որոշեց գնալ վրանում նստել ու բողոքի ակցիա անել, հիմա էլ Փաշինյանը կարող է գնալ Կառավարության առաջ նստել ու բողոքի ակցիա իրականացնել»,- նշել է քաղաքագետը:
Մանրամասները՝ տեսանյութում:
Հիմա եթերում
