Ալժիրը 12 տարվա դադարից հետո դուրս է գալիս աշխարհի առաջնության ասպարեզ՝ դիմակայելով Արգենտինային
16 Հունիսի 2026, 22:00
Ալժիրի հավաքականը պատրաստվում է անցկացնել իր առաջին հանդիպումն աշխարհի առաջնության եզրափակիչ փուլում՝ 12 տարվա դադարից հետո։ Աֆրիկյան թիմի կազմում այս առաջնությանը մասնակցելու են այնպիսի հայտնի ֆուտբոլիստներ, ինչպիսիք են Ռիադ Մահրեզը, Հուսեմ Աուարը և Լյուկա Զիդանը՝ լեգենդար Զինեդին Զիդանի որդին: Ի տարբերություն հոր՝ Լյուկան ընտրել է իր պատմական արմատները. նա դարպասապահ է և պաշտպանում է Ալժիրի ընտրանու դարպասն ու պատիվը։
Ալժիրցիների մեկնարկային մրցակիցն աշխարհի գործող չեմպիոն Արգենտինայի հավաքականն է, որի կազմում շարունակում է փայլել թիմի անգերազանցելի առաջատար Լիոնել Մեսսին։ Ալժիր — Արգենտինա հանդիպումը կկայանա Կանզասի քաղաքային մարզադաշտում, որը վերջերս գրանցել էր աղմկահարույց համաշխարհային ռեկորդ՝ անցնելով 142 դեցիբելի սահմանը։
Այս պատմական խաղից առաջ Ալժիրի երկրպագուները կիսվել են իրենց ակնկալիքներով ու հույսերով:
Հարցին, թե արդյոք թիմն ի վիճակի է պայքարել չեմպիոնի դեմ, երկրպագուներից մեկը պատասխանել է.
«Ի վերջո, արգենտինացիները հզոր թիմ են՝ 2022 թվականի աշխարհի լավագույն հավաքականը, բայց մենք նույնպես ուժեղ կազմ ունենք և հույս ունենք հաղթել նրանց։ Կարծում եմ՝ մեր թիմում շատ լավ խաղացողներ կան, և ես ոչ մեկին առանձնակի չեմ առանձնացնի. աջակցում եմ բոլորին և հավատում եմ, որ վաղը նրանք հիանալի կխաղան։ Չեմ ուզում կոնկրետ կանխատեսումներ անել, բայց վստահ եմ՝ մենք ի վիճակի ենք անակնկալ մատուցել։ Միակ բանը, որ հստակ կարող եմ ասել՝ մենք միայն հաղթանակի հույսով ենք դաշտ դուրս գալու»։
Մարզադաշտի մոտ հավաքված մեկ այլ երկրպագու շեշտել է.
«Մենք այստեղ ենք մեր թիմին աջակցելու համար։ Մենք հույս ունենք հիանալի խաղ ցուցադրել։ Հուսանք՝ Մահրեզը կամ Հաջ Մուսան իրենց լավագույն մակարդակում կլինեն և կզարմացնեն Արգենտինայի հավաքականին։ Մենք կարող ենք դա անել, ինչպես Մարոկկոյի հավաքականը արեց Բրազիլիայի դեմ։ Իրականում դա լիովին հնարավոր է»։
Մեկ այլ երկրպագու ավելացրել է, որ արգենտինացիներն են այս պահին ամենամեծ ճնշումը զգում։
«Ալժիրի հավաքականը խաղում է առանց մեծ ճնշման՝ զվարճանքի և նրանց աջակցելու համար այստեղ եկած մարդկանց համար։ Հետևաբար, կարծում եմ, մենք կարող ենք լավ արդյունքի հասնել Արգենտինայի դեմ, ինչպես որ այսօր և երեկ աֆրիկյան շատ թիմեր շատ լավ արդյունքներ ցույց տվեցին ուժեղ թիմերի դեմ»,- հավելել է երկրպագուն։
Ինչ վերաբերում է հաշվի կանխատեսումներին, տրիբունաներում գտնվող երկրպագուներն ունեն տարբեր կարծիքներ։
«Չափազանց բարդ խաղ է սպասվում. ես կանխատեսում եմ կա՛մ 1:1 ոչ-ոքի, կա՛մ Արգենտինայի հաղթանակ՝ 2:1 հաշվով»,- նշել է երկրպագուներից մեկը:
Հիմա եթերում
