Սանկտ Պետերբուրգի հայկական համայնքը հարգել է քաղաքի առաջին հայ հոգևորականի հիշատակը

Սանկտ Պետերբուրգի հայկական եկեղեցական համայնքի ներկայացուցիչները՝ քահանա Եփրեմ Զարգարյանի գլխավորությամբ, հարգել են Հյուսիսային մայրաքաղաքի առաջին հայ հոգևորական Հովհաննես Շարիստանյանի հիշատակը։

Սմոլենսկի լյութերական գերեզմանատանը գտնվող նրա շիրիմին քահանա Եփրեմ Զարգարյանը Արթիկի Լմբատավանքի վանահայր, քահանա Վիգեն Ղազարյանի հետ մատուցել է հոգեհանգստյան կարգ։

Շարիստանյանի գերեզմանը հայտնաբերվել է 2024 թվականին։ Քահանա Եփրեմ Զարգարյանի օրհնությամբ և «Մեր գործը» հիմնադրամի աջակցությամբ «Նոր սերունդ» երիտասարդական կազմակերպության ակտիվիստները մաքրել են տապանաքարը և հարակից տարածքը՝ շարունակելով հոգ տանել դրա պահպանության մասին։

Մինչև Սանկտ Պետերբուրգում հայկական եկեղեցու կառուցումը համայնքը Մոսկվայից էր հրավիրում հոգևորականների։ Այդ պատճառով 1730 թվականին Էջմիածնի կաթողիկոսությունը Սանկտ Պետերբուրգ մշտական ծառայության է ուղարկել Հովհաննես Շարիստանյանին (Շարիստանենց, 1710–1787), որը Ռուսաստանում գրանցվել է Իվան Պետրովիչ Շարիստանով անունով։

Տեր Հովհաննեսը ապրել է մինչև Սանկտ Պետերբուրգի Սուրբ Կատարինե եկեղեցու շինարարության ավարտն ու 1780 թվականին դրա օծումը։ Նա նույնիսկ ծառայել է եկեղեցում՝ առաջին հոգևոր հովիվ, ավագ քահանա Ստեփանոս Լորիս-Մելիքովի առաջնորդությամբ։